مسلم لیگی رہنما کا کہنا ہے کہ الیکشن کمیشن فارن فنڈنگ کیس میں فیصلہ لکھنا شروع کر دے، عوام فیصلہ لینے آرہے ہیں۔

تفصیلات کے مطابق پاکستان مسلم لیگ (ن) کی ترجمان مریم اورنگزیب نے پی ڈی ایم کے الیکشن کیشن کے باہر احتجاج پر بیان دیتے ہوئے کہاکہ تمام ریلیاں الیکشن کمیشن جانے کے لئے کشمیر چوک پر دوپہر ایک بجے جمع ہوں گی۔

انھوں نے کہاکہ عوام اور کارکنان سے اپیل ہے کہ وہ اس احتجاج کا حصہ بننے کےلئے الیکشن کمیشن پہنچنا شروع کر دیں۔

مر یم اورنگزیب نے کہاکہ الیکشن کمیشن فارن فنڈنگ کیس میں فیصلہ لکھنا شروع کر دے، عوام فیصلہ لینے آرہے ہیں، چوری پکڑی گئی ہے اور چور نے اعتراف جرم کر لیا ہے۔

مسلم لیگی رہنمانے کہاکہ فارن فنڈنگ کیس میں مرکزی ملزم عمران صاحب اعتراف جرم کر چکے ہیں، الیکشن کمیشن ضابطے کی کارروائی مکمل کرے۔

عمران صاحب فارن فنڈنگ کے ذریعے پاکستان اور اس کے عوام کے خلاف سازش کا یوم حساب آ چکا ہے۔

ترجمان مسلم لیگ ن نے مزید کہاکہ عمران صاحب تلاشی میں آپ رنگے ہاتھوں پکڑے جاچکے ہیں، اسی لئے عوام اب فیصلہ لینے آ رہے ہیں، آپ نے بس گھر آنا نہیں ہے۔

انھوں نے مزید کہاکہ مظاہرین کی مکمل مانیڑنگ کی جائے گی۔

فارن فنڈنگ کا معاملہ،  پی ڈی ایم کا الیکشن کمیشن کے سامنے احتجاج

واضح رہےکہ پاکستان ڈیموکریٹک موومنٹ (پی ڈی ایم) آج الیکشن کمیشن کے باہر سیاسی قوت کا مظاہرہ کرے گی، حکومت نے ریڈ زون میں داخلے کی اجازت دے دی، احتجاج پی ٹی آئی فارن فنڈنگ کیس میں پیش رفت کے لیے کیا جائے گا۔

مولانا فضل الرحمان اور مسلم لیگ ن کی مرکزی صدرمریم نواز احتجاج میں شریک ہوں گے۔

 بلاول بھٹو الیکشن کمیشن احتجاج میں کیوں نہیں آ رہے؟

مولانا فضل الرحمان سے صحافی نے سوال کیا تو مولانا نے جواب دیا کہ کسی کو احتجاج میں آنے کا پابند نہیں کیا گیا۔

گزشتہ روز وفاقی وزیر داخلہ شیخ رشید نے پی ڈی ایم کو تنبیہ کی کہ شوق سے آئیں لیکن بچے ساتھ نہ لائیں، مدرسے کے طلبہ احتجاج میں نظر آئے تو کارروائی ہوگی، احتجاج کے لیے فری ہینڈ دیں گے، کوئی رکاوٹ نظر نہیں آئے گی لیکن حفاظتی انتظامات پورے کریں گے۔