وزیر اعظم   عمران خان نے  بنیادی اشیائے ضروریہ کی وافر دستیابی کو یقینی بنانے کی ہدایت کردی۔

تفصیلات کے مطابق  وزیر  اعظم عمران خان کی زیر صدارت ملک بھر میں بنیادی اشیائے ضروریہ کی قیمتوں کی دستیابی و قیمتوں  کے جائزے کے لیے   اعلیٰ سطحی اجلاس ہوا۔

 اجلاس میں متعلقہ وفاقی و صوبائی وزراء، سیکریٹریز، چیف سیکریٹریز و دیگر سینئر افسران شریک ہوئے۔

وزیر خزانہ  عبدالحفیظ شیخ نے کنزیومر پرائس انڈیکس کے حوالے سے اجلاس کو بریفنگ  میں بتایا کہ  سالانہ بنیادوں کے تقابلی جائزے کی  بنیاد پر جنوری میں سی پی آئی 5.7فیصد ریکارڈ کیا گیا ہے ،یہ پچھلے سال 14.6فیصد تھا۔

عبدالحفیظ شیخ نے مزید بتایا کہ    جولائی سے جنوری تک سی پی آئی 8.2فیصد  ریکارڈ کیا گیا   جو پچھلے سال انہی مہینوں 11.2فیصد ریکارڈ کیا گیا تھا۔

انہوں نے بتایا کہ  ان اعدادوشمار کے مطابق سی پی آئی میں واضح کمی دیکھنے کو آئی ہے۔  چینی، انڈوں اور پیاز وغیرہ کی قیمتوں میں کمی جبکہ آٹے کی قیمت میں استحکام دیکھنے  میں آیا ہے۔

اجلاس کو حکومت کی جانب سے سرکاری گندم کی ریلیز کی صورتحال کے بارے میں  بھی بریفنگ دی گئی۔

 اجلاس میں ہول سیل اور ریٹیل کی سطح پر اور مختلف اضلاع میں قیمتوں میں پائے جانے والے فرق پر تفصیلی بریفنگ دی گئی۔

بریفنگ میں بتایا گیا کہ  ہول سیل اور ریٹیل میں قیمتوں میں فرق مارکیٹ کمیٹیوں کی ناکامی کی نشاندہی کرتا ہے۔

اجلاس میں فیصلہ کیا گیا کہ  تحریک انصاف کی دو صوبائی حکومتوں میں موجودہ مارکیٹ کمیٹیوں کو فوری طور پر ختم کر دیا  جائے گا اور   قابل افراد پر مشتمل کمیٹیوں کے قیام تک یہ ذمہ داری متعلقہ ضلعی و تحصیل انتظامیہ کو سونپی جائے گی۔

 پرائس لسٹ پر عمل درآمد نہ ہونے کی صورت میں متعلقہ اسسٹنٹ کمشنر کے خلاف کارروائی کرنے کا بھی فیصلہ کیا گیا۔

اجلاس میں چینی کی قیمتوں کو قابو میں رکھنے اور شوگر انکوائری رپورٹ کی روشنی میں لیے جانے والے مختلف اقدامات پر بھی بات چیت کی گئی۔

اجلاس میں فیصلہ کیا گیا کہ  شوگر ملوں میں کیمروں کی تنصیب کا عمل تیز کیا جائے گا۔  ایف بی آر کی جانب سے صوبائی حکومتوں کو شوگر کی مد میں وصول شدہ سیل ٹیکس کی تفصیلات فراہم کی جائیں گی  جس سے اس نظام کو شفاف بنایا جا سکے گا۔

بریفنگ میں بتایا گیا کہ ایف بی آر کے موثر اقدامات کے نتیجے میں جولائی سے جنوری کے عرصے میں شوگر سیل ٹیکس کی مد میں 84فیصد اضافہ دیکھنے میں آیا ہے۔

وزیر اعظم نے کہا کہ  بنیادی اشیاء کی دستیابی کو یقینی بنانے کے ساتھ ساتھ مناسب قیمتوں کو یقینی بنانا حکومت کی اولین ترجیح ہے ۔   تمام اسٹورز پر بنیادی اشیائے ضروریہ کی وافر دستیابی کو یقینی بنایا جائے۔

عمران خان نے کہا کہ  مستقبل کی ضروریات کے حوالے سے گندم، چینی جیسی بنیادی  اشیائے ضروریہ کے تخمینوں کا کام جلد از جلد مکمل کیا جائے  اور اس حوالے سے پیشگی انتظامات کو یقینی بنایا جائے۔

انہوں نے مزید کہا کہ پرائس لسٹ پر عمل درآمد کو یقینی بنایا جائے اور اس حوالے سے انتظامیہ کا متحرک اور فعال کردار یقینی بنایا جائے۔ غفلت کے مرتکب افسران کے خلاف فوری ایکشن کو یقینی بنایا جائے۔