وزیر اعلیٰ پنجاب عثمان بزدار کی معاون خصوصی فردوس عاشق اعوان کا کہنا ہے کہ  انتقام کی سیاست کے بانی ن لیگ والے ہیں۔

لاہور میں میڈیا سے گفتگو کرتے ہوئے وزیر اعلیٰ پنجاب عثمان بزدار کی معاون خصوصی فردوس عاشق اعوان کا کہنا تھا کہ  چوہوں کو پکڑنے کے لیے کڑکی لگائی جاتی ہے اس وقت عمران خان کے کرپشن کی کڑکی لگائی ہے،  ان سب کے سر اس کڑکی میں پھنسے ہوئے ہیں۔

ڈاکٹر فردوس عاشق اعوان کا کہنا ہے کہ  کئی دہائیوں کے بعد ن لیگ کو ڈسکہ میں پی ٹی  آئی کے بہادر کارکنوں نے دھول چٹائی ہے۔ کچھ عرصے بعد ن لیگ کے ہوش ٹھکانے آئیں گے۔

انہوں نے مریم نواز کو مخاطب کرتے ہوئے کہا کہ ا عصابی مریضہ روز ایک تھیٹر سجاتی ہیں، ہر روز ایک نیا جھوٹ ایجاد کیا جاتا ہے۔

ڈاکٹر فردوس عاشق اعوان نے مزید کہاکہ  آج جھوٹوں کی رانی نے نیا شوشہ چھوڑا ہے۔ آج مخصوص اداروں کو الیکشن سے جوڑا ہے، قومی سلامتی کے اداروں کو الیکشن سے جوڑنے کی کوشش کی گئی۔

انہوں نے کہا کہ  وزیر آباد کے الیکشن کو شفاف الیکشن کہتی ہے اور ڈسکہ الیکشن کو دھاندلی کہتی ہے۔ دھاندلی لیگ اپنی ٹیم کی نائب کپتان کا کام ہی دھاندلی زدہ بیانیہ مارکیٹ کرنا ہے۔

فردوس عاشق اعوان نے کہا کہ  ایک میچ پی ایس ایل اور دوسرا دھاندلی لیگ اور عمران خان کا چل رہا ہے۔ عمرن خان نے ایک یارکر مار کو دھاندلی لیگ کو کلین بولڈ کردیا ہے۔