ترجمان دفتر خارجہ زاہد حفیظ چوہدری کا کہنا ہے کہ پاکستان کسی بھی مہم جوئی کا جواب دینے کی صلاحیت رکھتا ہے۔
ہفتہ وار میڈیا بریفنگ میں ترجمان دفتر خارجہ زاہد حفیظ چوہدری کا کہنا تھا کہ پاکستان نے پہلے بھی بھارتی مہم جوئی کا جواب دیا ہےاور ہم آئندہ بھی جواب دینے کی ہرممکن صلاحیت رکھتے ہیں۔
زاہد حفیظ چوہدری نے کہا کہ لائن آف کنٹرول کے دونوں اطراف کشمیریوں کا جانی مالی نقصان ہو رہا ہے، پاکستان اس پر شدید تشویش میں مبتلا ہے۔ہم بھارت کو بارہا کہتے ہیں کہ فائر بندی معاہدے کی پاسداری کرے۔
انہوں نے کہا کہ وفاقی وزیر انسانی حقوق نے مقبوضہ کشمیر میں انسانی حقوق کی خلاف وزیوں پر آواز اٹھائی۔ ترک وزیر خارجہ نے بھی مقبوضہ کشمیر میں انسانی حقوق کی پامالیوں کی نشاندہی کرتے ہوئے پابندیاں ختم کرنے کا مطالبہ کیا۔
ترجمان دفتر خارجہ نے کہا کہ پاکستان اور بھارت کے مابین رابطے کو سراہتے ہیں۔ رابطہ اپنی جگہ تاہم پاکستان اپنے اصولی موقف میں کوئی تبدیلی نہیں لائے گا۔
زاہد حفیظ چوہدری کا کہنا تھا کہ وزیراعظم عمران خان نے سری لنکا کا پہلا دورہ کیا جس میں سائنس وٹیکنالوجی، زراعت، سیاحت اور دفاعی شعبوں میں تعاون پر بات چیت ہوئی۔
انہوں نے کہا کہ پاکستان نے سری لنکا کو دفاعی شعبے میں تربیتی تعاون کی پیشکش کی۔دورے میں پاکستان، سری لنکا پارلیمنٹریز گروپ بھی تشکیل دیا گیا۔
ترجمان دفتر خارجہ نے کہا کہ وزیر اعظم نے خطے میں امن کے لیے مذاکرات پر زور دیا۔ وزیراعظم نے سری لنکا کو سی پیک میں شمولیت کی دعوت بھی دی۔
زاہد حفیظ چوہدری نے مزید کہا کہ وزیر خارجہ شاہ محمود قریشی نے قطر کا دورہ کیا جس میں افغان امن عمل پر تفصیلی گفتگو کی گئی۔ افغان صدر کے وفد نے بھی پاکستان کا دورہ کیا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News