وزیر اعظم عمران خان کا کہنا ہے کہ گردشی قرضوں میں مسلسل اضافہ ہو رہا ہے۔

تفصیلات کے مطابق  صوبہ بلوچستان کے کسانوں اور کاشتکاروں کی سہولت کے لیے وزیر اعظم عمران خان  نے ٹیوب ویلز کی سولرئزایشن کی منظوری  دے دی۔

فیصلہ وزیر اعظم عمران خان کی زیر صدارت اجلاس میں لیا گیا۔

اجلاس میں وزیراعلیٰ بلوچستان جام کمال ،  متعلقہ وفاقی و صوبائی  وزراء اور سینئر حکام شریک تھے۔

ٹیوب ویلز کی سولرئزایشن سے کسانوں کو بلاتعطل بجلی کی فراہمی ممکن ہوگی اور بجلی کی مد میں ہونے والے نقصانات  پر قابو پانے میں مدد ملے گی۔

وزیراعظم  نے پاور ڈویژن اور صوبائی حکومت کو سولرئزایشن منصوبے پر جامع پلان اور حکمت عملی مرتب کرنے کی ہدایت کرتے ہوئے کہا کہ  سولرئزایشن منصوبے کے حوالے سے ٹائم لائنز پر مبنی روڈمیپ جلد از جلد مرتب  کیے جائیں۔

عمران خان نےکہا کہ  بلوچستان میں حکومت کی جانب سے ٹیوب ویلز کی مد میں اربوں روپے کی سبسڈی فراہم کیے جانے کے باوجود بھی کسان مشکلات کا شکار ہیں۔

انہوں نے مزید کہا کہ  گردشی قرضوں میں مسلسل اضافہ ہو رہا ہے،   بجلی کی مد میں ہونے والے نقصانات کا خمیازہ بلوچستان  اور پورے ملک کی عوام کو بھگتنا پڑ رہا ہے۔

وزیر اعظم نے کہا کہ   ترجیحی بنیادوں پر اس مسئلے کے حل کو یقینی بنایا جائے۔ سبسڈی کا موثر اور مناسب استعمال حکومت کی اولین ترجیح ہے۔