مسلم لیگ ن کی رہنما مریم اورنگزیب کا کہنا ہےکہ ڈسکہ کے عوام 10 اپریل کو گھروں سے ان چوروں سے بدلہ لینے کے لیے نکلیں۔

تفصیلات کے مطابق مسلم لیگ ن کی ترجمان مریم اورنگزیب نے نیب عدالت کے باہر میڈیا سے گفتگو کے دوران کہا کہ الیکشن چوری کرنے کی کوشش کرنے والوں کو عبرت کا نشان بنایا جائے۔

انہوں نے کہاکہ ایک بھی ووٹ جعلی ڈلوانے کی کوشش کی گئی تو ڈسکہ میں آپ کی جگہ نہیں ہوگی۔

انہوں نے مطالبہ کرتے ہوئے مزید کہا کہ ڈسکہ کے الیکشن پر سپریم کورٹ کا تاریخی فیصلہ آیا، جیوفنسنگ کی رپورٹ پبلک کی جائے افسران کو کہاں رکھا گیا۔

مریم اورنگزیب کا کہنا تھا کہ شہباز شریف اور نواز شریف کے خلاف کاغذ کوڑے کے ڈبے کی نظر ہوگئے، ان سے چینی کنٹرول نہیں ہو رہی، ان کے دائیں بائیں چینی مافیا بیٹھا ہے، اگر ریاستی اداروں نے پہرہ نہ دیا تو عوام کا ہاتھ ہوگا اور آپ کا گریبان ہوگا۔

مریم اورنگزیب نے کہا  کہ چینی چوروں کی فہرست میں پہلا نام عمران خان کا ہے، عمران خان کا فرنٹ مین کیوں ڈگڈگی بجا رہا ہے۔

انہوں نے کہاکہ آج شہباز شریف کے دور میں بنائی سڑکیں ٹوٹ گئی ہیں، ن لیگ کے 5 سال کے دور میں ایک روپیہ چینی کی قیمت نہیں بڑھی، ن لیگ دور میں اشیاء ضروریہ کی قیمتیں کنٹرول میں رہیں۔

انہوں نے مسلم لیگ ن کی نائب صدرمریم نواز سے متعلق کہا کہ ان کی طبیعت پہلے سے بہت بہتر ہے۔

مریم اورنگزیب نے مزید کہا کہ مجھے آج نیب عدالت کے باہر روکا گیا، میڈیا نے تعاون کیا، جب نالائقوں سے حکومت نہیں چلتی تو اس طرح کی حرکتیں کرتے ہیں۔