وزیر خارجہ مخدوم شاہ محمود قریشی نے کہا ہے کہ افغانستان ہمارا ہمسایہ اور اہم برادر ملک ہے۔

تفصیلات کے مطابق اسپیکر افغان ولسی جرگه میر رحمان رحمانی کی وزارتِ خارجہ میں وزیر خارجہ مخدوم شاہ محمود قریشی سے ملاقات ہوئی جس میں دو طرفہ تعلقات اور افغان امن عمل سمیت باہمی دلچسپی کے امور پر تبادلہ خیال کیا گیا۔

ملاقات میں وزیر خارجہ مخدوم شاہ محمود قریشی نے افغان مہاجرین کی باوقار اور جلد وطن واپسی کیلئے عالمی برادری کے تعاون کی ضرورت پر بھی زور دیا۔

وزیر خارجہ مخدوم شاہ محمود قریشی نے کہا کہ آپ کو ‏اقتصادی تعاون تنظیم کی پارلیمانی  اسمبلی  کی دوسری جنرل کانفرنس میں شرکت کیلئے پاکستان آمد پر خوش آمدید کہتا ہوں۔

شاہ محمود قریشی نے یہ بھی کہا کہ پاکستان اور افغانستان برادر ملک ہے، دونوں ممالک یکساں تاریخی، مذہبی اور ثقافتی اقدار کی بنیاد پر ایک دوسرے کے ساتھ جڑے ہوئے ہیں۔

وزیر خارجہ کا کہنا تھا کہ وزیر اعظم عمران خان کے وژن کی روشنی میں پاکستان اور افغانستان کے مابین دو طرفہ تعلقات کو مضبوط اور مستحکم بنانے کیلئے پر عزم ہیں۔

 شاہ محمود قریشی کا یہ بھی کہنا تھا کہ پاکستان اور افغانستان کے درمیان پارلیمانی روابط کا فروغ، دو طرفہ تعلقات کو مستحکم بنانے کیلئے اہمیت کا حامل ہے۔

وزیر خارجہ مخدوم شاہ محمود قریشی کا مزید کہنا تھا کہ الزام تراشیوں پر مبنی منفی بیانات، افغان امن عمل اور دو طرفہ تعلقات کو متاثر کر سکتے ہیں ، افغان امن عمل سمیت خطے میں قیام امن کیلئے اپنی کاوشیں بروئے کار لاتے رہیں گے۔

اس موقع پر اسپیکر افغان ولسی جرگه میر رحمان رحمانی نے افغانستان میں قیام امن کیلئے پاکستان کے مصالحانہ کردار کو سراہتے ہوئے، وزیر خارجہ مخدوم شاہ محمود قریشی اور پاکستان کی قیادت کا شکریہ ادا کیا۔