صدر مملکت ڈاکٹر عارف علوی کا کہنا ہے کہ نوجوان نسل اپنے گردونواح کو صاف ستھرا اور سرسبز بنانے میں اپنا کردار ادا کرے۔

تفصیلات کے مطابق صدر مملکت ڈاکٹر عارف علوی نے ایوان صدر میں مون سون شجرکاری مہم کے تحت پودے لگانے کی تقریب  میں شرکت کی اور ایک پودا بھی لگایا۔

تقریب میں  معاون خصوصی برائے موسمیاتی تبدیلی ملک امین اسلم نے صدر مملکت کو مون سون شجرکاری کے بارے بریفنگ پیش کی۔

بریفنگ میں بتایا گیا کہ ملک بھر میں  2018 سے 2023 تک 3.296 ارب درخت لگائے جائیں گے جبکہ  ایوان صدر کے احاطے میں تقریبا 10 ہزار پودے لگائے جائیں گے۔

اس موقع پر  تقریب سے خطاب کرتے ہوئے صدر عارف علوی کا کہنا تھا کہ نوجوان زیادہ سے زیادہ درخت لگا کر پاکستان کو ’صاف و شاداب‘بنانے میں اپنا کردار ادا کریں۔

عارف علوی نے کہا کہ موسمیاتی تبدیلی کے منفی اثرات کم کرنے اور آئندہ نسلوں کو صاف اور صحت مند ماحول دینے  کے لیے درخت بہت ضروری ہیں۔

ان کا کہنا تھا کہ پاکستان کو بے پناہ خوبصورتی اور قدرتی وسائل سے نوازا گیا ہے اس ہی وجہ سے ملک کے شمالی علاقوں کے خوبصورت مقامات کی جانب لاکھوں سیاح متوجہ ہوتے ہیں۔

صدر مملکت نے کہا کہ پاکستان کا ماحولیاتی نظام موسمیاتی تبدیلی، گلوبل وارمنگ اور جنگلات کی کٹائی کی وجہ سے خطرے سے دوچار ہےاس لیے ملک میں جنگلات میں اضافے کیلئے اجتماعی کوششوں کی بہت ضرورت ہے۔