وزیر اعظم آزاد کشمیر سردار عبد القیوم نیازی نے کہا ہے کہ نہ اپنا بچے گا نہ پرایا’ احتساب سب کا ہو گا۔

تفصیلات کے مطابق وزیر اعظم آزاد کشمیر سردار عبدالقیوم نیازی کی زیر صدارت آزاد جموں و کشمیر کابینہ کا اجلاس مظفرآباد میں منقعد ہوا جس میں ملک کے ترقیاتی امور پر بات چیت ہوئی۔

ذرائع کا کہنا ہے کہ اس اجلاس میں کابینہ نے اصلاحاتی ایجنڈے پر عملدرآمد کے لیے 6 ماہ کے اہداف مقرر کیے ہیں۔

وزیر اعظم سردار عبد القیوم نیازی کا اس اجلاس میں کہنا تھا کہ محکمہ جات محنت لگن سے کام کریں۔

انہوں نے کہا کہ 86 ہزار بچوں کو ہر صورت اسکولوں میں داخل کروایا جائے گا۔

وزیر اعظم آزاد کشمیر کا اس موقعے پر کہنا تھا کہ ہم وزیر اعظم پاکستان عمران خان کے ویژن کے مطابق  تعمیر و ترقی و خوشحالی کے نئے دور کا آغاز کرنے جا رہے ہیں۔

ان کا کہنا تھا کہ اپنا بچے گا نہ پرایا’ احتساب سب کا ہو گا۔

ذرائع کے مطابق سالڈ ویسٹ مینجمنٹ، بلدیاتی انتخابات کی تیاری، بجلی پانی کی فراہمی، ڈاکٹرز اور استاتذہ کی حاضری یقینی بنانا ششماہی اہداف میں شامل ہے۔

ذرائع کا کہنا ہے کہ کابینہ نے مظفرآباد، میرپور اور راولاکوٹ میں سیف سٹی پراجیکٹ شروع کرنے کا بھی فیصلہ کیا ہے۔

ذرائع کا یہ بھی کہنا تھا کہ کابینہ کا استور کیل سڑک کے علاوہ شونٹر ٹنل ہائی وے کا کام این ایچ کے ساتھ مل کر شروع کرنے کا فیصلہ ہوا ہے۔

ذرائع نے کہا کہ کابینہ نے ایڈھاک ایکٹ ختم کرنے کا طریقہ کار وضع کرنے کے لیے کابینہ کمیٹی تشکیل دے دی ہے۔

ذرائع نے کہا کہ کابینہ نے ایک سال میں بلدیاتی الیکشن کروانے کا اعلان بھی کیا ہے۔

ذرائع کے مطابق اجلاس میں بلدیاتی الیکشن ایکٹ میں ترمیم کے لیے وزیر بلدیات کی سربراہی میں کمیٹی قائم کرنے کا بھی فیصلہ ہوا ہے۔

ذرائع کا کہنا تھا کہ اجلاس کے دوران وزیر اعظم آزاد جموں و کشمیر نے اے ڈی پی کو ریویو کرتے ہوئے ترقیاتی فنڈز کے بروقت استعمال کی ہدایت بھی دی۔

ذرائع کا کہنا تھا کہ کابینہ نے احتساب ایکٹ میں ترمیم کا فیصلہ کیا جس پر وزراء پر مشتمل کمیٹی تشکیل دی گئی۔

وزیر اعظم آزاد کشمیر سردار عبد القیوم نیازی کا اس موقعے پر مزید کہنا تھا کہ انتظامیہ اور پولیس عوام کے لیے آسانیاں پیدا کرے۔