بیرون ملک جانے کے خواہش مند پاکستانی شہری ملک میں رہتے ہوئے کس طرح انٹرنیشنل ڈرائیونگ لائسنس حاصل کر سکتے ہیں، آیئے ہم آپ کو بتاتے ہیں۔

اگر آپ بیرون ملک جانے اور وہاں خود گاڑی چلانے کی خواہش رکھتے ہیں تو اس کے لیے آپ کو وہاں کے ڈرائیونگ لائسنس کی ضرورت نہیں بلکہ آپ پاکستان میں ہی انٹرنیشنل ڈرائیونگ لائسنس بنواسکتے ہیں۔

انٹرنیشنل ڈرائیونگ لائسنس پہ آپ دنیا کے تقریباً تمام ہی ممالک میں گاڑی چلاسکتے ہیں۔

پاکستان کے شہری اپنے ملک میں رہتے ہوئے ہی انٹرنیشنل ڈرائیونگ لائسنس کے لیے درخواست دے کر لائسنس حاصل کرسکتے ہیں۔

تاہم اس کے لیے ضروری ہے کہ آپ سٹی ٹریفک پولیس کی طرف سے جاری قومی ڈرائیونگ لائسنس  کے حامل ہوں۔

اگر آپ سٹی ٹریفک پولیس کی طرف سے جاری قومی ڈرائیونگ لائسنس  کے حامل ہیں تو اپنے صوبے کے متعین کردہ طریقہ کار کے تحت انٹرنیشنل لائسنس کے لیے درخواست دے سکتے ہیں۔

اسلام آباد:

دارالحکومت اسلام آباد میں انٹرنیشنل ڈرائیونگ لائسنس کے حصول کے لیے آپ سٹیزن فیسیلیٹیشن سینٹر جی الیون فور میں درخواست دے سکتے ہیں۔

درخواست دینے کے لیے آپ کے پاس اسلام آباد ٹریفک پولیس کے جاری کردہ ڈرائیونگ لائسنس کی نقل، دو پاسپورٹ سائز تصاویر، ویزا کے ساتھ پاسپورٹ کی ایک فوٹوکاپی، قومی شناختی کارڈ کی ایک فوٹوکاپی، اسلام آباد میں رہائش کا ثبوت، پوسٹ آفس سے حاصل کیا گیا 30روپے کااسٹیمپ  پیپر اور میڈیکل سرٹیفکیٹ(50سال یا اس سے زائد عمر کے لوگوں کے لیے)لازمی ہے۔

پنجاب:

اگر آپ صوبہ پنجاب کے رہائشی ہیں تو آپ کو پہلے ’راستہ ایپ‘ پر اپوائنٹمنٹ حاصل کرنی ہوگی۔ یہ ایپ  آپ کو’گوگل پلے اسٹور ‘ یا ’ایپل اسٹور ‘  پہ باآسانی مل جائے گی۔

 اس ایپ پر  مطلوبہ تفصیلات  فراہم کرکے آپ اپوائنٹمنٹ بک کر سکتے ہیں اور اپنے قریب ترین لائسنسنگ سینٹر کا انتخاب  بھی کر سکتے ہیں۔

فارم پُر کرنے کے لیے پاسپورٹ سائز کی دو تصدیق شدہ تصاویر، ایک قومی شناختی کارڈ کی تصدیق شدہ فوٹوکاپی، درخواست گزار کے پاسپورٹ کی ایک فوٹوکاپی، قومی ڈرائیونگ لائسنس کی ایک فوٹوکاپی، میڈیکل سرٹیفکیٹ (50سال اور اس سے زائد عمر کے لوگوں کے لیے)، ڈسٹرکٹ کورٹ سے حاصل کیا گیا 66روپے کا ایک ٹکٹ اور حبیب بینک لمیٹڈ میں ادا کرنے کے لیے 450روپے کا فیس واؤچر ہونا لازمی ہے۔

سندھ:

صوبہ سندھ میں رہنے والے  انٹرنیشنل ڈرائیونگ لائسنس کے لیے ڈرائیونگ لائسنس سندھ کی ویب سائٹ  سے اپنی پسند کے سینٹر کا انتخاب کر سکتے ہیں۔

درخواست دینے کے لیے تین پاسپورٹ سائز کی تصاویر، سندھ پولیس کی طرف سے جاری کردہ پاکستانی ڈرائیونگ لائسنس کی ایک کاپی، ویزے کے ساتھ پاسپورٹ کی فوٹوکاپی، قومی شناختی کارڈ کی فوٹوکاپی، میڈیکل سرٹیفکیٹ (50سال یا زائد عمر کے لوگوں کے لیے) اور صوبہ سندھ میں رہائش کا ثبوت مہیا کرنا لازمی ہے۔

خیبر پختونخوا:

خیبر پختونخوا کے رہائشی پشاور میں واقع تسنیم پلازہ کی دوسری منزل پر  کمرہ نمبر 11 میں جاکر درخواست  دے سکتے ہیں۔

 درخواست دینے کے لیے آپ کے پاس دو پاسپورٹ سائز تصاویر ، پاکستانی ڈرائیونگ لائسنس کی ایک فوٹوکاپی، ویزے کے ساتھ پاسپورٹ کی ایک فوٹوکاپی، قومی شناختی کارڈ کی ایک فوٹوکاپی ، رہائش کا ثبوت، پوسٹل ڈرائیونگ اسٹیمپ اور میڈیکل سرٹیفکیٹ (50سال یا اس سے زائد عمر کے لوگوں کے لیے)مہیا کرنا لازمی ہوں گے۔