قائد حزب اختلاف شہبازشریف سے ایم کیوایم پاکستان کی قیادت کی اہم ملاقات ہوئی ہےجس میں عدم اعتماد میں تعاون سے متعلق تجاویز پر مشاورت کی گئی ہے۔

ملاقات کے بعد ن لیگ کی ترجمان مریم اورنگزیب کے بیان مطابق پاکستان مسلم لیگ (ن) کے صدر اور قائد حزب اختلاف شہبازشریف سے ایم کیوایم پاکستان کی قیادت کی ملاقات ہوئی۔

ملاقات کے دوران قائدین نے قومی اور عوامی اہمیت کے امور پر رابطے اور مشاورت جاری رکھنے اور تعاون سے متعلق تجاویز کا تبادلہ جاری رکھنے پر مشاورت کی ہے۔

اس دوران شہباز شریف اور ایم کیوایم کے وفد کے درمیان مزاکرات ہوئے جس میں مولانا فضل الرحمان بھی موجود تھے۔

اس ملاقات کے دوران اپوزیشن نے ایم کیو ایم سے تحریک عدم اعتماد پر حمایت اور تعاون طلب کیا ہے جبکہ پیپلزپارٹی کے ساتھ معاملات طے پانے پر بھی اظہار اطمینان کیا گیا ہے۔

دوسری جانب اس ملاقات کا اعلامیہ بھی جاری کردیا گیا ہے جس کے مطابق خالد مقبول صدیقی نے شہباز شریف اور مولانا فضل رحمن کو کل شام 5 بجے کی دعوت دے دی ہے۔

اعلامیے میں بتایا گیا ہے کہ اپوزیشن قائدین اور ایم کیو ایم میں ملاقات کل پارلیمنٹ لاجز میں ہوگی جس میں شہبازشریف اور مولانا فضل الرحمان کے ہمراہ پارٹی وفود کو بھی مدعو کیا گیا ہے۔

خیال رہے کہ پی ڈی ایم سربراہ مولانا فضل الرحمن کی خصوصی دعوت پر ملاقات میں شرکت کی جبکہ خالد مقبول صدیقی کی قیادت میں وفد میں عامر خان، وسیم اختر اور معین الحق شامل تھے۔