اسد عمر نے کہا ہے کہ عمران خان قومی یکجہتی کی علامت ہے۔

وفاقی وزیر اسد عمر نے سیالکوٹ میں تحریک انصاف کے ورکرز کنونشن سے خطاب کرتے ہوئے کہا کہ یہ ملک ہمارے آباو اجداد نے بنایا، ہمارے آباو اجداد چاہتے تھے کہ برصغیر کے مسلمان آزادی سے زندگی گزاریں۔

انہوں نے کہا کہ بد قسمتی سے ہمارے ملک میں ضمیر فروش حکمران آئے، حکمرانوں نے بیرونی قوتوں کے آگے سر جھکا کر ان کی غلامی کی۔

وفاقی وزیر کا کہنا تھا کہ غیر ملکی حکمرانوں کے آگے پرچیاں لکھ کر جاتے تھے، پرچی پڑھتے ہوئے میاں صاحب کی ٹانگیں کانپ رہی تھیں۔

اسد عمر کا یہ بھی کہنا تھا کہ ہم آزادی کے لئے ہر قسم کی قربانی دینے کو تیار ہیں، آپ کا کپتان دنیا کے آگے جھکنے کو تیار نہیں، کپتان کہتا ہے کہ ہم غلامی کی زندگی نہیں گزاریں گے۔

وفاقی وزیر نے کہا کہ پاکستان دنیا کی واحد اسلامک ایٹمی طاقت ہے، پاکستان ایک مشکل ملک ہے اور  پاکستان کو بہت سے چیلنجز ہیں۔

اسد عمر نے یہ بھی کہا کہ پوری قوم متحد ہو اور ریاست کے تمام ادادرے مل کر بیرونی چیلنجز کا مقابلہ کریں۔

ان کا کہنا تھا کہ پوری قوم متحد ہو اور ریاست کے تمام ادادرے مل کر بیرونی چیلنجز کا مقابلہ کریں۔

اسد عمر کا یہ بھی کہنا تھا کہ عمران خان قومی یکجہتی کی علامت ہے، عمران خان واحد لیڈر ہے جس کی آواز پر ملک کے کونے کونے سے عوام نکل آتی ہے۔

انہوں نے کہا کہ پاکستان کی آزادی کو 75 سال مکمل ہونے والے ہیں، عمران خان نے کہا کہ اگر حملہ کرو گے تو ہم سوچیں گے نہیں بلکہ بھرپور جواب دیں گے۔

وفاقی وزیر اسد عمر کا مزید کہنا تھا کہ کپتان نے نا ایک قدم پیچھے ہٹنا ہے نا سر جھکانا ہے، کپتان نے سر اٹھا کر مقابلہ کرنا ہے، کپتان کی آپ سے اگلی ملاقات ڈی چوک اسلام آباد میں ہو گی۔