خرم نواز گنڈاپور نے کہا ہےکہ مظلوموں کو انصاف دینا عدلیہ کی ذمہ داری ہے۔

پاکستان عوامی تحریک کے سیکرٹری جنرل خرم نواز گنڈا پور نے اپنے ایک بیان میں کہا کہ سانحہ ماڈل ٹاؤن کے شہدا کی آٹھویں برسی 17 جون کو منائیں گے۔

انہوں نے کہا کہ سانحہ کی غیر جانبدار تفتیش کے لیے قانونی چارہ جوئی کرتے8 سال ہوگئے، معزز عدلیہ سے درخواست ہے انصاف کے لیے زیر التوا اپیلوں کو ترجیحا نمٹائیں۔

خرم نواز گنڈا پور کا کہنا تھا کہ مظلوموں کو انصاف دینا عدلیہ کی ذمہ داری ہے، سپریم کورٹ نے اپیلیں جلد نمٹانے کی جو ہدایات جاری کیں ان پر دو سال کے بعد بھی عمل نہیں ہوا۔

انہوں نے کہا کہ سانحہ ماڈل ٹاؤن کے ذمہ داروں کا ایک بار پھر برسراقتدار آنا المیہ ہے۔

پاکستان عوامی تحریک کے سیکرٹری جنرل خرم نواز گنڈا پور نے مزید کہا کہ پولیس کے قاتل افسران اہم عہدوں پر تعینات کر دیے گئے، اے ڈی خواجہ کی سربراہی میں بننے والی جے آئی ٹی کو تفتیش مکمل کرنے دی جائے۔

سانحہ ماڈل ٹاون کیا ہے؟

17 جون 2014 کو لاہور کے علاقے ماڈل ٹاون میں تحریک منہاج القرآن کے مرکزی سیکریٹریٹ اور پاکستان عوامی تحریک (پی اے ٹی) کے سربراہ ڈاکٹر طاہر القادری کی رہائش گاہ کے سامنے قائم تجاوزات کو ختم کرنے کے لیے آپریشن کیا گیا تھا۔

آپریشن کے دوران پی اے ٹی کے کارکنوں نے مزاحمت کی، پولیس کے ساتھ جھڑپ کے نتیجے میں 14 افراد ہلاک ہو گئے تھے جبکہ 90 کے قریب زخمی بھی ہوئے تھے۔