وفاقی وزیر منصوبہ بندی و ترقی احسن اقبال کا کہنا ہے کہ معیشت کو مشکلات کے ریڈ زون سے نکالنے کیلئے کوششیں جاری ہیں۔

احسن اقبال نے تقریب سے خطاب کرتے ہوئے کہا کہ وزیراعظم نواز شریف نے 2013 میں سی پیک معاہدے پر دستخط کیے، سی پیک سے 2013-18 تک 29 ارب ڈالر کی سرمایہ کاری ہوئی۔

‘ہم چین کی حکومت کے شکرگزار ہیں’

انہوں نے کہا کہ جب سی پیک پر کام کا آغاز ہوا تو روزانہ اٹھارہ سے بیس گھنٹے لوڈشیڈنگ تھی، اسی دور میں چینی قیادت نے دوستی کا حق ادا کرتے ہوئے سرمایہ کاری کی۔

وفاقی وزیر نے کہا کہ اپریل 2014 میں چینی صدر نے پاکستان کا تاریخی دورہ کیا، چینی صدر کے تاریخی دورہ پاکستان کے موقع پر 46 ارب ڈالر کے معاہدے ہوئے۔

احسن اقبال نے کہا کہ چین کے ساتھ معاہدے کے بعد پاکستان نے توانائی بحران پر قابو پایا، اسی سفر میں پاکستان میں موٹرویز کا جال اور انفراسٹکچر پر تیزی سے کام ہوا، ہم چین کی حکومت کے شکرگزار ہیں اور چین نے آئین برادر کا حق ادا کیا۔

‘سی پیک کی بدولت تھر کے کوئلے سے سستی بجلی پیدا کی جارہی ہے’

انکا کہنا تھا کہ سپر کریٹیکل ٹیکنالوجی کو کول منصوبے میں استعمال کیا گیا، متبادل انرجی کے ذرائع پر بہاولپور میں منصوبے کے کام کا آغاز کیا گیا، چین کے منصوبے پاکستان کی معیشت کیلئے آکسیجن ثابت ہوئے۔

وفاقی وزیر نے کہا کہ سی پیک کی بدولت تھر کے کوئلے سے سستی بجلی پیدا کی جارہی ہے، چین میں لیبر لاسٹ بڑھ چکی ہے اس لیے انڈسٹری ریلوکیٹ ہو رہی ہے۔

‘جب سے اتحادی حکومت آئی سی پیک پر دوبارہ تیزی کام شروع ہوا’

انہوں نے کہا کہ گزشتہ چار سالوں میں کسی ایک اکنامک زون پر کام کا آغاز نہیں ہو سکا، گزشتہ چار سالوں میں سی پیک کو کولڈ اسٹوریج میں ڈال دیا گیا، جب سے اتحادی حکومت آئی ہے سی پیک پر دوبارہ تیزی کام شروع ہے۔

احسن اقبال نے کہا کہ معیشت کو مشکلات کے ریڈ زون سے نکالنے کیلئے کوششیں جاری ہیں، تین ماہ قبل لوگ شرطیں لگا رہے تھے کہ پاکستان سری لنکا بن جائے گا، اب دوبارہ معیشت کی بحالی کا آف شروع ہو چکا ہے۔

‘موسماتی تبدیلی سے پاکستان پانچویں نمبر پر آگیا’

انہوں نے مزید کہا کہ موسماتی تبدیلی سے متاثرہ ممالک میں پاکستان پانچویں نمبر پر آ گیا ہے، ماحولیاتی تبدیلی سے بچنے کیلئے کلین انرجی اور گرین منصوبوں کی ضرورت ہے۔