سابق وزیراعظم عمران خان نے کہا کہ دنیا کو پتا چل گیا ہے کہ عمران خان کودہشتگردی کے مقدمہ میں ڈال دیا گیا ہے۔

میڈیا سے گفتگو کرتے ہوئے چیئرمین پی ٹی آئی عمران خان نے کہا کہ یہ مقدمہ پوری دنیا کے سامنے ایک مذاق بن گیا ہے، آج میں نے حاضری دی معلوم بھی ہے کہ یہ ایک مذاق ہے۔

عمران خان کا کہنا تھا کہ جے آئی ٹی کے سوالوں کےجواب دے دیے ہیں، دنیا کو پتا چل گیا ہے کہ عمران خان کودہشتگردی کے مقدمہ میں ڈال دیا گیا ہے۔

انہوں نے کہا کہ مجھے اور میری پارٹی کوجتنا دیوار سے لگائیں گے اتنا ہی ہم تیار ہو رہے ہیں، پہلے میں چپ تھا کہ معاشی حالات برے تھے پھرسیلاب آگیا۔

عمران خان نے کہا کہ ٹیلی تھون کے ذریعے پیسے اکٹھے کیے توچینلزبند  کروا دیے جبکہ ہم نے صرف5گھنٹوں میں10ارب روپے جمع کیے ہیں۔

ان کا کہنا تھا کہ سینیٹر سیف اللہ کے گھرکل ایف آئی اے نے چھاپا مارا، سیاسی فنڈنگ کرنے والوں کوڈرایا دھمکایا جارہا ہے۔

چیئرمین پی ٹی آئی نے کہا کہ شہبازگل پرتشدد کیا گیا،ہم نے کہا قانونی کارروائی کریں گے، کارروائی کی بات کی تودہشتگردی کی دفعات لگائی گئیں،یہ مذاق ہے۔

عمران خان نے کہا کہ ان تمام چیزوں کا ایک ہی حل ہے کہ فوری الیکشن کرائےجائیں، انہیں چیلنج ہے جس دن کال دی آپ برداشت نہیں کرسکیں گے۔

انہوں نے کہا کہ یہ عوام میں جاتے ہیں تو لوگ ان کو گالیاں نکالتے ہیں، ہم پر چور مسلط کیےگئے ہیں یہ کبھی برداشت نہیں کروں گا۔

عمران خان کا کہنا تھا کہ صرف ایک بات ہوسکتی ہے اور وہ شفاف انتخابات کی ہوگی ۔

انہوں نے مزید کہا کہ آئی ایم ایف،ورلڈبینک رپورٹ ہے پاکستان سری لنکاکی طرف جارہا ہے، آئی ایم ایف،ورلڈبینک کہہ رہا ہے کہ معیشت ان سےسنبھالی نہیں جارہی۔

واضح رہے کہ عمران خان کو جے آئی ٹی کی جانب سے تحریری طور پر 21سوالات پر مشتمل سوالنامہ دیا گیا جس پر انہوں نے پوچھے گئے سوالات کے تسلی بخش جوابات دئیے۔