پاکستان تحریک انصاف (پی ٹی آئی) کے رہنما میاں اسلم اقبال نے کہا ہے کہ 22کروڑ پاکستانیوں کی امیدوں کا مرکز عمران خان ہیں۔

سینئر صوبائی وزیر میاں اسلم سے 90 شاہراہ قائد اعظم پر سیاسی شخصیات کی ملاقاتیں ہوئیں جن میں صوبائی وزیر ملک غضنفر چھینہ، اراکین اسمبلی عرفان نیازی، عامرعنایت، ثانیہ کامران، معظم جتوئی، عبدالحئی دستی، چودھری عدنان، خواجہ داؤد اور دیگر شامل تھے۔

‘حکومت کے پاس عوام کے مسائل کا حل نہیں’

میاں اسلم نے ملاقات کے دوران گفتگو کرتے ہوئے کہا کہ 14 جماعتوں پر مشتمل نام نہاد حکمران اتحاد نے خود کو ریلیف اور عوام کو تکلیف دی، سازش کے تحت آئی وفاقی حکومت کے پاس عوام کے مسائل کا حل نہیں۔

انہوں نے کہا کہ امپورٹڈ سرکار اب نام نہاد ارسطو کو معیشت ٹھیک کرنے کے لئے امپورٹ کرنے جارہی ہے، اپنی چوری چھپانے کیلئے اقتدار کا سہارا لینے والوں کو عوام سے کوئی سروکار نہیں۔

‘غلامی کی زنجیریں توڑنے کیلئے عوام کپتان کے ساتھ کھڑے ہیں’

پی ٹی آئی رہنما نے کہا کہ 22کروڑ پاکستانیوں کی امیدوں کا مرکز عمران خان ہیں، حقیقی آزادی اور کرپٹ ٹولے سے نجات کی تحریک آخری مرحلے میں ہے۔

میاں اسلم اقبال نے مزید کہا کہ غلامی کی زنجیریں توڑنے کے لئے عوام کپتان کے ساتھ کھڑے ہیں، عمران خان مزدور، کسان اور عام آدمی کی مضبوط آواز ہیں۔

عمران خان کا کرک خیبر پختونخوا میں عظیم الشان جلسے کا اعلان

پاکستان تحریک انصاف کے چیئرمین عمران خان نے کرک خیبر پختونخوا میں عظیم الشان جلسے کا اعلان کیا ہے۔

تفصیلات کے مطابق سابق وزیراعظم عمران خان نے عوام کے نام خصوصی پیغام میں کہا کہ آج بروز اتوار دن 3 بجے میں کرک میں جلسہ عام سے مخاطب ہوں گا۔

عمران خان نے کہا کہ کرک کے پاکستانیوں سے حقیقی آزادی تحریک کی تیاری سے متعلق گفتگو ہوگی۔

سابق وزیراعظم اور پاکستان تحریک انصاف کے چیئرمین عمران خان کا مزید کہنا تھا کہ انشاءاللہ ملک کے عوام کو حقیقی طور پر آزاد کروائیں گے۔