حریت رہنما یاسین ملک کی اہلیہ مشعال ملک نے کہا ہے کہ ارشد شریف کے خاندان کا درد جموں کشمیر کے ہر گھر کا درد ہے۔

تفصیلات کے مطابق حریت رہنما یاسین ملک کی اہلیہ مشعال ملک نے آرٹس کونسل میں تصویری نمائش میں میڈیا سے گفتگو کرتے ہوئے کہا کہ ارشد شریف کے قتل پر پورا پاکستان سوگ میں ہے، ارشد شریف کے 5 بچے ہیں جو نہایت لائق ہیں۔

مشعال ملک نے کہا کہ روز جموں کشمیر میں صحافیوں کا قتل کیا جا رہا ہے، بھارتی فوج ان کی لاشوں پر بوٹ گاڑھتے ہیں، ارشد شریف کے خاندان کا درد جموں کشمیر کے ہر گھر کا درد ہے۔

ان کا کہنا تھا کہ 5 اگست 2019 کو بھارتی سرکار نے دنیا بھر کے قوانین توڑے، کشمیریوں کو انسان نہیں سمجھا، کشمیریوں پر ظلم ہوا تو قدرت نے دنیا کو کورونا کی آزمائش دی، جموں کشمیر میں کیمیائی ہتھیار استعمال ہو رہے ہیں، ان ہتھیاروں سے ماس پگھلتا ہے، پیلٹ گن استعمال ہوتی ہے۔

انہوں نے کہا کہ بھارتی افواج نے کتوں کی فوج بھی رکھی ہوئی ہے، سید علی گیلانی کے ساتھ زیادتی ہوئی، میت گھسیٹی گئی، اشرف صحرائی جیسے رہنما کو بھی جیل میں زہر دیا گیا، ریڈ لائنز کی بات ہوتی ہے، پاکستان کا پانی کشمیر سے آرہا ہے، پاکستان کی 60٪ صنعت کشمیر کے پانی سے چل رہی ہے۔

مشعال ملک نے کہا کہ پاکستانی قوم جموں کشمیر کے لیے کیوں تحریک نہیں چلاتے ہیں؟ جناح کی دی گئی آزادی کشمیر کے بغیر نامکمل ہے، سیاسی جماعتیں کاش بھارتی سفارتخانے کے باہر بھی دھرنا دیں۔