کراچی سمیت سندھ بھر میں 7 روزہ انسداد پولیو مہم کا  آغاز آج سے ہوگیا ہے۔

تفصیلات کے مطابق 7 روزہ انسداد پولیو مہم 30 اکتوبر تک جاری رہے گی، سندھ کے 21 اضلاع میں 67 لاکھ بچوں کو پولیو سے بچاؤ کے قطرے پلائے جائیں گے۔

ایمرجنسی آپریشن سینٹر برائے انسداد پولیو مہم سندھ نے بتایا کہ سندھ بھر میں جولائی 2020 تا آج تک ایک بھی مثبت کیس رپورٹ نہیں ہوا۔

خیال رہے کہ رواں سال ملک میں پولیو کے 20 کیسز رپورٹ ہوچکے ہیں جبکہ گزشتہ ماہ کراچی میں پولیو کے ماحولیاتی نمونے مثبت آئے تھے۔

محکمہ صحت کی سندھ بھر میں بلا تعطل پولیو مہم جاری رکھنے کی ہدایات

محکمہ صحت نے سندھ بھر میں بلاعطل پولیو مہم جاری رکھنے کی ہدایات دی ہیں۔

محکمہ صحت سندھ نے پولیو مہم میں رکاوٹ بننے والے افراد کے خلاف سخت کارروائی کا حکم بھی دے دیا ہے۔

اس حوالے سے محکمہ صحت سندھ نے تمام اضلاع کے ڈپٹی کمشنر کو خط بھی لکھ دیا ہے۔

محکمہ صحت نے خط میں لکھا کہ لیڈی سپر وائزر اور لیڈی ہیلتھ ورکرز ہڑتال پر ہیں، پولیو مہم ملکی مفاد کے لیے اشد ضروری ہے۔

خط میں مزید لکھا گیا کہ ڈپٹی کمشنرز کسی بھی صورت اس میں تعطل نہ آنے دیں، جو بھی ورکر پولیو مہم میں حصہ نہ لے اسکے خلاف سخت کارروائی کی جائے، ڈسپلنری ایکشن کے تحت انکے خلاف کارروائی عمل میں لائی جائے۔

خیال رہے کہ دوسری جانب کراچی کے چند یوسیز میں ہیلتھ ورکرز کے بائیکاٹ کے باعث مہم شروع نہ ہوسکی۔

ورکرز کا سندھ بھر میں انسداد پولیو مہم کا بائیکاٹ

گزشتہ روز سندھ بھر میں آج سے شروع ہونے والی انسداد پولیو مہم کا ورکرز نے بائیکاٹ کرنے کا اعلان کر دیا تھا۔

 سندھ میں آج سے شروع ہونے والی انسداد پولیو مہم کا لیڈی ہیلتھ ورکرز ایسوسی ایشن اور پیرامیڈیکل اسٹاف نے بھی بائیکاٹ کر دیا۔

واضح رہے کہ 7 روزہ انسداد پولیو مہم آج 24 اکتوبرسے شروع ہوگئی ہے جبکہ اس مہم کا سندھ بھر کے طبی اور غیر طبی عملے، پولیو ورکرز اور لیڈی ہیلتھ ورکرز نے بائیکاٹ کر دیا تھا۔