اسلام آباد: ملک بھر میں سیکڑوں پیٹرول پمپس غیر قانونی طور پر چلائے جانے کا انکشاف ہوا ہے۔

تفصیلات کے مطابق لیز ختم ہونے کے بعد بھی 206 پیٹرول پمپس نے غیر قانونی طور پر فروخت جاری رکھی، یہ پمپس اسمگل ہوکر آنے والی پیٹرولیم مصنوعات فروخت کرنے میں بھی ملوث ہیں۔

آڈیٹر جنرل آف پاکستان محمد اجمل گوندل نے ذمہ داری آئل اینڈ گیس ریگولیٹری اتھارٹی (اوگرا) پر ڈال دی ہے۔

آڈیٹر جنرل کی رپورٹ کے مطابق پمپس نے لیز ختم ہونے کے باوجود غیر قانونی فروخت جاری رکھی اور اوگرا نے پیٹرول پمپس کے خلاف کوئی ایکشن نہیں لیا اور غیر قانونی فروخت بند کروانے کیلئے ضلعی انتظامیہ سے رابطہ بھی نہیں کیا گیا۔

رپورٹ میں بتایا گیا کہ کابینہ ڈویژن نے معاملہ وفاقی کابینہ میں اٹھایا، وزیر خزانہ کی سربراہی میں کمیٹی معاملے کی تحقیقات کررہی ہے۔

حکومت نے شہریوں کو پیٹرول کی قیمت میں بڑے ریلیف سے محروم کردیا 

ذرائع کے مطابق وفاقی حکومت نے ایک بار پھر  پیٹرولیم مصنوعات کی قیمتیں بڑھادیں، پیٹرول پر فی لیٹر لیوی 14روپے 84 پیسے کا اضافہ کردیا گیا۔

ذرائع نے بتایا کہ پیٹرول پر فی لیٹر لیوی47 روپے 26 پیسے کردی گئی جبکہ اس سے قبل پیٹرول پر فی لیٹر لیوی 32 روپے 42 پیسے عائد تھی۔

اس کے علاوہ پیٹرول 14 روپے 84 پیسے فی لیٹر سستا کرنے کی ورکنگ کی گئی تھی، ہائی اسپیڈ ڈیزل 5 روپے 44 پیسے فی لیٹر مہنگا کرنے کی تجویز تھی۔

مٹی کے تیل کی قیمت میں 6 روپے 4 پیسے اضافے کی تجویز تھی جبکہ لائٹ ڈیزل آئل 8 روپے41 پیسے فی لیٹر مہنگا کرنے کی تجویز تھی۔

خیال رہے کہ حکومت نے 31 اکتوبر تک پیٹرولیم مصنوعات کی قیمتیں برقرار رکھنے کا فیصلہ کیا تھا۔

حکومت کا پیٹرولیم مصنوعات کی قیمتیں برقرار رکھنے کا فیصلہ

چند روز حکومت نے پیٹرولیم مصنوعات کی قیمتیں برقرار رکھنے کا فیصلہ کیا تھا۔

اس حوالے سے وزارت خزانہ نے باضابطہ نوٹیفکیشن جاری کر دیا تھا۔ اطلاق آئندہ 15 روز کیلئے ہوگا۔

نوٹیفیکشن میں بتایا گیا تھا کہ پیٹرول کی فی لیٹر قیمت 224روپے 80پیسے اور ہائی اسپیڈ ڈیزل کی قیمت 235 روپے 30 پیسے کی سطح پر برقرار رہے گی۔

نوٹیفیکشن کے مطابق مٹی کے تیل کی فی لیٹر قیمت 191 روپے83 پیسے پر برقرار رہے گی جبکہ لائٹ ڈیزل آئل کی بھی فی لیٹر قیمت 186روپے 50 پیسے پر برقرار رہے گی۔