صدر میں ڈینٹل کلینک پر فائرنگ کے واقعے میں ملوث مرکزی ملزم کو گرفتار  کرلیا گیا ہے جس کا تعلق کالعدم تنظیم سےہے۔

تفصیلات کے مطابق صوبئ وزیر اطلاعات شرجیل انعام میمن نے پریس کانفرنس کے دوران بتایا ہے کہ صدر میں کلینک پر حملہ کرنے والے دہشتگرد کو گرفتار کرلیا گیا ہے۔

انہوں نے بتایا کہ سی ٹی ڈی اورخفیہ اداروں نے مشترکہ کارروائی میں دہشتگرد کو گرفتار کیا ہے جس کانام وقارخشک ہے۔

انہوں نے بتایا ہے کہ 100 سی سی ٹی وی فوٹیجز کی مدد سے دہشت گرد کوگرفتار کیا گیا ہے جو کہ اپنے ساتھیوں سے رابطے میں تھا تاہم دیگر ساتھیوں کی گرفتاری کے لیےاہلکار سرگرم ہیں۔

صوبائی وزیر نے کہا کہ دہشتگردوں کا مقصد ترقی کو روکنا اور امن کو نقصان پہنچانا ہے تاہم قانون نافذ کرنے والےادارے بہترین طریقے سے فرائض نبھا رہے ہیں۔

ان کا کہنا تھا کہ چندماہ قبل کراچی یونیورسٹی میں خودکش حملہ ہواتھا جس کے دہشتگرد پکڑے گئے تاہم چند روز قبل داعش کے 2 دہشتگرد بھی مارے گئے ہیں۔

انہوں نے بتایا کہ امجد صابری کو قتل کرنے والے دہشتگرد بھی گرفتار ہوگئے ہیں۔

خیال رہے کہ گزشتہ ماہ کراچی کے علاقے صدر میں چینی ڈینٹسٹ کے کلینک پر حملے میں ایک شخص ہلاک اور دو زخمی ہوگئے تھے۔

پولیس نے بتایا کہ نامعلوم مشتبہ شخص ڈاکٹر ایچ یو رچرڈ کے کلینک میں بطور مریض پہنچا اور علاج کے لیے اس کا نمبر آتے ہی فائرنگ کر دی۔

سینئر سپرنٹنڈنٹ پولیس (ایس ایس پی) ساؤتھ سید اسد رضا نے بتایا کہ واقعے میں ڈاکٹر رچرڈ کا ملازم رونالڈ مارا گیا۔

انہوں نے مزید کہا کہ جب کہ ڈاکٹر رچرڈ اور ان کی اہلیہ مارگریٹ کو چوٹیں آئی ہیں۔

ایس ایس پی نے یہ بھی بتایا کہ ڈاکٹر اور ان کی اہلیہ کی صحت خطرے سے باہر ہے، انہوں نے مزید کہا کہ زخمی اور مرنے والوں کی دوہری شہریت ہے۔