چیئرمین تحریک انصاف عمران خان کا کہنا ہے کہ  دوستی سب سے کرنا چاہتے ہیں لیکن غلامی قبول نہیں۔

تفصیلات کے مطابق لانگ مارچ کے شرکاء سے ویڈیو خطاب کرتے ہوئے عمران خان  کا کہنا تھا کہ چین، روس  اور امریکہ سے  اچھے  تعلقات چاہتے ہیں ۔

عمران خان نے کہا کہ   دوستی سب سے کرنا چاہتے ہیں لیکن غلامی  کسی کی قبول نہیں۔ بھارت سے دوستی کے لیے بھی میں نے کوششیں کیں۔  کشمیر کا مسئلہ حل ہو جائے تو بھارت سے بھی دوستی کے لیے تیار ہیں۔

انہوں نے کہا کہ   جس کی دلچسپی پاکستان میں نہیں وہ فیصلے کیسے کر رہا ہے۔  پاکستان کا پیسہ چوری کرنے والا ملک  کے فیصلے کرے گا؟

چیئرمین تحریک انصاف کا کہنا تھا کہ  مفرور شخص کو اہم معاملات پر فیصلوں کی اجازت نہیں دینی چاہیے۔ مفرور شخص  فیصلے کرے گا کہ ملک  میں کب الیکشن ہونے چاہئیں۔

عمران خان کا مزید کہنا تھا کہ  شہباز شریف اہم تعیناتی پر مفرور سے کیسے مشاورت کرسکتے ہیں۔ شہباز شریف سیکرٹ قانون کی خلاف ورزی کررہے ہیں۔ مفرور سے مشورے پر قانونی ٹیم معاملے کو دیکھ رہی ہے، لندن میں الیکشن سمیت اہم تعیناتی کا فیصلہ ہو رہا ہے۔

عمران خان نے مطالبہ کیا کہ ارشد شریف کو کس نے دھمکیاں دیں،کس نے مقدمات درج کرائے، وہ کس کی وجہ سے بیرون ملک گئے،اس کی شفاف تحقیقات ہونی چاہئیں۔

انہوں نے کہا کہ  ہماری تحریک حقیقی آزادی  کے لیے ہے۔  انصاف کا نظام ہوگا تو سرمایہ کاری ہوگی ، پیسہ آسکتا ہے۔ اوور سیز پاکستانی  ڈونیشن دیتے ہیں لیکن سرمایہ کاری نہیں کرتے۔ اوور سیز سرمایہ کاری کرنا چاہتے ہیں لیکن اعتماد کی کمی ہے۔

چیئرمین تحریک انصاف کا کہنا تھا کہ   اوور سیز  پاکستانی پلاٹ بھی خریدیں تو قبضہ ہو جاتا ہے۔ اوور سیز کو انصاف نہیں ملتا تو بیرون ملک سرمایہ کاری کرتے ہیں۔

عمران خان نے کہا کہ  اوور سیز پاکستانیوں کو انصاف ملے تو بڑا سرمایہ آسکتا ہے۔ اوور سیز ملک میں سرمایہ کاری کردیں تو قرضوں کی ضرورت نہیں ہوگی۔ جب تک انصاف کا نظام نہیں ہوگا ایشین ٹائیگر نہیں بن سکتے۔

ان کا کہنا تھا کہ  سابق وزیر اعظم مقدمہ درج نہیں کرا سکتا تو عام شہری کا کیا حال ہوگا۔  سپریم کورٹ میں آج درخواست دائر کی گئی ہے، امید ہے معزز چیف جسٹس ہماری درخواست کو سنیں گے۔

چیئرمین تحریک انصاف نے مزید کہا کہ   مجھے پتہ ہے میرے اوپر قاتلانہ حملہ کس نے کیا،  تحقیقات ہوں ، ہو سکتا ہے وہ حملے میں ملوث نہ ہو۔

عمران خان کا کہنا تھا کہ  شہباز شریف کے ساتھ برطانیہ میں جو کچھ ہوا سب کو پتہ ہے۔ برطانوی عدالت نے شہباز شریف پر ڈیڑھ کروڑ  روپے جرمانہ عائد کیا۔ برطانوی عدالت نے کہا قانون کے سامنے سب برابر ہیں۔

انہوں نے مزید کہا کہ  دنیا میں جو بھی خوشحال ملک ہیں وہاں انصاف کا نظام ہے۔ ملک میں قانون کی حکمرانی چاہتے ہیں۔ فیصلہ کن وقت ہے ملک کو قانون کی بالادستی کی طرف لائیں،قانون کی حکمرانی ہوگی تو ملک خوشحال ہوگا۔

چیئرمین تحریک انصاف نے کہا  کہ اعظم سواتی پر تشدد ہوا،ویڈیو بھیجی گئی جو سب کے لیے باعث شرمندگی ہے۔  اعظم سواتی، ارشد شریف  اور مجھ پر حملے کے معاملے پر درخواست دی ہے۔