سابق وزیراعظم اور پاکستان تحریک انصاف (پی ٹی آئی) کے چیئرمین عمران خان نے کہا ہے کہ قوم کسی طور پر خود کو پھر سے غلامی کی زنجیروں میں جکڑنے کی اجازت نہیں دے گی۔

تفصیلات کے مطابق چیئرمین تحریک انصاف عمران خان کی پاکستان فیڈرل یونین آف جرنلسٹس اور کونسل آف پاکستان نیوز پیپرز ایڈیٹرز کے وفد سے ملاقات ہوئی جس میں باہمی دلچسپی کے امور پر تفصیلی تبادلۂ خیال ہوا۔

ملاقات میں پاکستان میں میڈیا پر عائد بدترین سنسرشپ پر شدید تحفظات کا اظہار ہوا۔

چیئرمین تحریک انصاف نے اپنی تقاریر کی براہِ راست نشریات پر پابندیوں پر دوٹوک مؤقف اختیار کرنے پر پی ایف یو جے اور سی پی این ای کے زعماء سے شکریہ ادا کیا۔

آزادئ اظہار اور حُرّیتِ ابلاغ پر تحریک انصاف کے اصولی مؤقف کی بھرپور حمایت پر بھی شکریہ ادا کیا۔

چیئرمین تحریک انصاف عمران خان کا اس موقعے پر کہنا تھا کہ دستورِ پاکستان شہریوں کو اظہار اور پرامن سیاسی سرگرمیوں کا مکمل حق دیتا ہے، روایتی سیاست سے کہیں بالا ملک میں حقیقی آزادی کی تحریک زوروں پر ہے۔

عمران خان نے کہا کہ حکومت سے نکالے جانے سے لیکر آج تک نہایت سنگین سازشوں کا سلسلہ دراز ہے، قوم کی حقیقی آزادی کی تڑپ اور آواز کو دبانے کیلئے پرامن مارچ کو خون میں نہلایا گیا۔

ان کا کہنا تھا کہ مسلح حملے میں میرے ایک کارکن نے جامِ شہادت نوش کیا جبکہ درجن بھر زخمی ہوئے، رب العزت کے فضل و احسان سے شرانگیز اپنے عزائم کی تکمیل میں ناکام رہے، ذمہ داروں کی مقدمے میں نامزدگی کا حق رکھتے ہیں، نادیدہ دباؤ ابھی تک راہ میں حائل ہے.

انہوں نے کہا کہ جمعرات کے روز سے حقیقی آزادی مارچ حملے کے مقام سے دوبارہ اپنی منزل کی جانب روانہ ہو گا، ملک بھر سے قافلے راولپنڈی پہنچیں گے جہاں سے اگلی منزل کیلئے قیادت کروں گا۔

عمران خان نے مزید کہا کہ قوم کسی طور خود کو پھر سے غلامی کی زنجیروں میں جکڑنے کی اجازت نہیں دے گی۔

Advertisement

پاکستان فیڈرل یونین آف جرنلسٹس اور کونسل آف پاکستان نیوز پیپرز ایڈیٹرز کے وفد کی ملاقات
باہمی دلچسپی کے امور پر تفصیلی تبادلۂ خیال
چیئرمین تحریک انصاف کی خیریت دریافت کی اور جلد و مکمل صحتیابی کی دعا کی
ملاقات میں پاکستان میں میڈیا پر عائد بدترین سنسرشپ پر شدید تحفظات کا اظہار pic.twitter.com/WLRKrpEWx5

— PTI (@PTIofficial) November 7, 2022