پاکستان تحریک انصاف (پی ٹی آئی) مہنگائی کے خلاف عوام کی آواز بن گئی، آج سے ملک بھر میں احتجاج شروع کیا جائے گا۔

تفصیلات کے مطابق عمران خان کی سربراہی میں پاکستان تحریک انصاف (پی ٹی آئی) کی سینیئر لیڈر شپ کے اجلاس میں کیے گئے فیصلے کے تحت مہنگائی کے خلاف (جمعے) آج سے ملک گیر مظاہرے ہونگے۔

اس حوالے سے پی ٹی آئی رہنما فواد چوہدری نے احتجاج کا شیڈول جاری کرتے ہوئے بتایا تھا کہ پہلے مرحلے میں 3 ہفتوں تک حلقوں میں ایم این ایز اور ایم پی ایز کی سربراہی میں احتجاجی ریلیاں نکالی جائیں گی اور تین ہفتے بعد تحریک کی قیادت خود عمران خان کرینگے۔

فواد چوہدری نے کہا کہ اعظم سواتی کی گرفتاری کیخلاف پیر کو احتجاج ہوگا۔ جب تک حکومت نہیں جاتی احتجاج کا سلسلہ وقتاً فوقتاً جاری رکھیں گے۔

پی ٹی آئی رہنما نے مزید کہا کہ تحریک انصاف  ٹیکنوکریٹ حکومت کو مسترد کرتی ہے، پاکستان میں ایسے طرز حکومت کی گنجائش نہیں، عوام کا مطالبہ فوری اور شفاف انتخابات ہیں۔

واضح رہے کہ زمان پارک لاہور میں عمران خان کی زیر صدارت سینیئر پارٹی قیادت کے اجلاس میں فیصلہ کیا گیا تھا کہ پی ٹی آئی جمعے سے احتجاجی تحریک دوبارہ شروع کرے گی۔

عمران خان کی مصروفیات

دوسری جانب ذرائع نے بتایا کہ عمران خان آج لاہور زمان پارک میں ارکان اسمبلی اور پارٹی رہنماؤں سے ملاقاتیں کریں گے۔

ذرائع کے مطابق ملاقاتوں میں قومی اسمبلی میں استعفوں سمیت دیگر امور کا جائزہ لیا جائے گا۔

ذرائع کا کہنا ہے کہ پنجاب میں اعتماد کے ووٹ اور صوبائی اسمبلی کی تحلیل پر بھی مشاورت ہوگی۔

خیال رہے کہ زمان پارک میں سیکیورٹی کے انتہائی سخت انتظامات کردیے گئے ہیں اور عمران خان کی رہاش گاہ کے اردگرد سی سی ٹی وی کیمروں کی مدد سے نگرانی کی جارہی ہے۔