پاکستان تحریک انصاف کے چیئرمین عمران خان کا کہنا ہے کہ افسوس ہے وفاقی حکومت ہیلتھ کارڈ انشورنس کے فنڈز جاری نہیں کررہی۔

سابق وزیراعظم عمران خان نے مدر اینڈ چائلڈ اسپتال میانوالی کے افتتاح کے موقع پر گفتگو کرتے ہوئے کہا کہ مدراینڈ چائلڈ اسپتال ڈاکٹر یاسمین کا شروع کیا ہوا ہے، یہ اسپتال ڈی آئی خان اور لکی مروت والوں کو بھی سہولت مہیا کرے گا۔

چیئرمین عمران خان نے میانوالی میں
مدر اینڈ چائلڈ اسپتال کا افتتاح کردیا#ImranKhan #Mianwali pic.twitter.com/5Ws1PUnoQ0

— BOL Network (@BOLNETWORK) December 20, 2022

3 چیزوں پر بات کرنا چاہتا ہوں

چیئرمین پی ٹی آئی نے کہا کہ 3 چیزوں پر بات کرنا چاہتا ہوں، سب سے زیادہ خواتین زچگی کے دوران انتقال کرجاتی ہیں، اس کی اہمیت اس لیے زیادہ ہے کیونکہ ہمارے ہاں اسپتال کم ہیں۔

مزید پڑھیں: پرویز الٰہی نے ہیلتھ کارڈ واجبات کی ادائیگی کیلئے وزیراعظم شہباز شریف کو خط لکھ دیا

عمران خان نے کہا کہ اپنی حکومت کے ساڑھے 3سال میں سب سے زیادہ خوشی ہیلتھ کارڈ کی تھی، اب تک ہیلتھ انشورنس پر 3ارب روپے خرچ ہو چکے ہیں۔

انکا کہنا ہے کہ افسوس ہے وفاقی حکومت ہیلتھ کارڈ انشورنس کے فنڈزجاری نہیں کررہی، امیر ممالک کے پاس بھی ہیلتھ کارڈ کی سہولت نہیں۔

ہیلتھ کارڈ ایک گھرانے کے لیے بڑی نعمت ہے

سابق وزیراعظم نے کہا کہ ہیلتھ کارڈ ایک گھرانے کے لیے بڑی نعمت ہے، کسی بھی نجی اسپتال سے 10لاکھ تک کا مفت علاج کرواسکتے ہیں، پورا خیبرپختونخوا ہیلتھ کارڈ سے سہولت اٹھا رہا ہے۔

انہوں نے کہا کہ ہماری حکومت گئی تو وفاق کی ہیلتھ کارڈ پر توجہ نہیں، ہیلتھ کارڈ کی وجہ سے لوگوں نے اسپتال بنانا شروع کردیے تھے۔

چیئرمین پی ٹی آئی نے کہا کہ ہیلتھ کارڈ کی وجہ سے لوگوں کے پاس علاج کے لیے پیسہ تھا، ہیلتھ کارڈ کی کامیابی بہت بڑی کامیابی ہے۔

پانی انسان کی بنیادی ضرورت ہے

عمران خان نے کہا کہ پانی انسان کی بنیادی ضرورت ہے، میانوالی میں جب سیاست شروع کی تو سب کا مسئلہ پانی تھا۔

سابق وزیراعظم نے مزید کہا کہ ہمارے خٹک بیلٹ کے علاقے میں سب سے بڑا مسئلہ پانی کا تھا، جہاں جانور اور انسان پانی ایک ساتھ پیتے تھے وہاں صاف پانی مل رہا ہے۔