وفاق کو  توشہ خانہ کے تحائف کی تفصیلات فراہم کرنے کے حکم پر پاکستان تحریک انصاف (پی ٹی آئی) رہنماؤں کی جانب سے ردعمل سامنے آگیا ہے۔

اس حوالے سے شیخ رشید نے اپنے بیان میں کہا ہے کہ لاہور ہائیکورٹ نے توشہ خانہ کا 1947 سے ریکارڈ طلب کر کے سنہری فیصلہ دیا ہے۔

انہوں نے کہا کہ ایک طرف محلاتی روائیتی سیاست ہے اور دوسری طرف عوام کی سیاست ہے، عوام کا فیصلہ طاقت سے روکا جارہا ہے، لوگوں کے لیے اقتدار سب کچھ ہوتا ہے اور بعض کے لیےعزت اور احترام۔

حکومت توشہ خانہ کی تفصیلات دینے سے کیوں بھاگ رہی ہے؟

دوسری جانب فواد چوہدری نے اپنے جاری کردہ بیان میں کہا کہ حیرت کی بات ہے کہ جس حکومت کا اپنی اپوزیشن کے خلاف سارا مقدمہ ہی توشہ خانے کے تحائف ہر ہے، وہ توشہ خانہ کی تفصیلات دینے سے کیوں بھاگ رہی ہے؟۔

عمران خان کی توشہ خانہ سے خریدے گئے تحائف کی لسٹ تو شائع کردی گئی

فرخ حبیب نے اپنے ٹوئٹر پر کہا کہ عمران خان صاحب کی توشہ خانہ سے خریدے گئے تحائف کی لسٹ تو شائع کردی گئی ہے، لیکن1947 سے لیکر اب تک کی تفصیلات لاہور ہائیکورٹ طلب کررہی ہے تو حکومت تفصیلات دینے سے انکاری ہے۔

فرخ حبیب نے مزید کہا کہ اب فرار ہوکر بھاگنا نہیں ہے چیلنج قبول کرے ، انکو  پتہ ہے توشہ خانہ تفصیلات پبلک کردی تو ساری پی ڈی ایم نااہل ہوجائے گی۔

سب پبلک سرونٹس کی تفصیلات عوام کے سامنے آنی چاہیں

توشہ خانہ کی تفصیلات سے متعلق عمران اسماعیل نے کہا کہ اگر عمران خان کی توشہ خانہ کی تفصیلات پبلک کی جا سکتی ہیں تو باقی لوگوں کی کیوں نہیں ہو سکتی؟

سابق گورنر سندھ نے کہا کہ حکومتی وکیل کی عجیب منطق ہے، عمران خان کے لیے قانون الگ اور دیگر کے لیے الگ۔

ایک گھڑی کو لے کر 9 مہینوں سے چیخ رہے تھے اب انکی بولتی بند ہوگئی

پی ٹی آئی سندھ کے صدر و سابق وفاقی وزیر علی زیدی کا نے کہا ہے کہ عمران خان نے گھڑی قانونی طور پر خریدی، جو ایک گھڑی کو لے کر نو مہینوں سے چیخ رہے تھے اب ان کی بولتی بند ہوگئی ہے۔

یہ بھی پڑھیں: عمران خان نے توشہ خانہ سے جو تحائف لیے وہ قانون کے مطابق قیمت ادا کر کے حاصل کئے، فرخ حبیب

سابق وفاقی وزیر نے مزید کہا کہ عدالت نے تفصیلات مانگی ہیں، اب سب کے سامنے دودھ کا دودھ اور پانی کا پانی ہو جانا چاہیے، تاکہ اس قوم کو پتا چلے کہ نواز اور زرداری سمیت کس نے توشہ خانہ کو کتنا لوٹا۔

توشہ خانے کے تحائف کی تفصیلات طلب

خیال رہے کہ لاہور ہائی کورٹ نے وفاقی حکومت سے توشہ خانے سے دیے جانے والے تحائف کی تفصیلات طلب کر لیں۔

توشہ خانے سے تحائف وصول کرنے والوں کی تفصیلات کی فراہمی کے لیے شہری منیر احمد کی درخواست پر جسٹس عاصم حفیظ نے سماعت کی۔

لاہور ہائی کورٹ نے وفاق کو 16جنوری تک تفصیلات فراہم کرنے کا حکم دے دیا۔

یہ بھی پڑھیں: عمران خان نے توشہ خانہ تحائف فروخت کر کے کرپشن کی، عطا تارڑ کا الزام

اسسٹنٹ اٹارنی جنرل نے عدالت کو بتایا کہ توشہ خانہ کی معلومات خفیہ ہیں سامنے نہیں لائی جاسکتیں۔

جسٹس عاصم حفیظ نے کہا کہ جو تحائف دے دیے گئے وہ خفیہ کیسے ہو گئے، تفصیلات خفیہ ہونے یا نہ ہونے کا تعین عدالت کرے گی۔ اگر تو وفاقی حکومت ان تحائف کو اپنے پاس رکھتی تو معاملہ خفیہ سمجھا جاتا۔

درخواست گزار کے وکیل اظہر صدیق کا کہنا ہے کہ عدالت نے واضع ریمارکس دیے کہ ٹیکس گوشواروں میں ظاہر تحائف  خفیہ کیسے ہوسکتے ہیں۔

 لاہور ہائیکورٹ نے کیس کی سماعت 16 جنوری تک ملتوی کردی ہے۔