شہید محترمہ بینظیر بھٹو کی 15ویں برسی کے موقع پر پی پی پی چیئرمین بلاول بھٹو زرداری اور سابق صدر آصف علی زرداری کی جانب سے خراج عقیدت پیش کیا گیا ہے۔

پاکستان پیپلز پارٹی کے چیئرمین و وزیرِ خارجہ بلاول بھٹو زرداری نے شہید محترمہ بینظیر بھٹو کے پندرہویں یوم شہادت پر پیغام دیتے ہوئے کہا کہ شہید محترمہ بینظیر بھٹو کو  خراج عقیدت پیش کرتے ہیں۔

شہید محترمہ بینظیر بھٹو کو ہم ہر روز یاد کرتے ہیں

انہوں نے کہا کہ شہید محترمہ بینظیر بھٹو کا تدبر اور فلسفہِ مفاہمت دنیا کا مشترکہ میراث ہے، دخترِ مشرق کا میراث ملکی و عالمی سیاسی مشکلات کے متعلق قابلِ عمل لائحہ عمل بھی ہے۔

بلاول بھٹو نے کہا کہ شہید محترمہ بینظیر بھٹو کو ہم ہر روز یاد کرتے ہیں، ہم ہر روز محترمہ کے فکر اور ویژن سے رہنمائی حاصل کرتے ہیں۔

شہید محترمہ بینظیر جیسے کرشماتی لیڈر صدیوں میں پیدا ہوتے ہیں

انکا کہنا ہے کہ شہید محترمہ بینظیر بھٹو اپنے دور سے بہت آگے کا ادراک رکھنے والی کرشماتی لیڈر تھیں، ان جیسے کرشماتی لیڈر صدیوں میں پیدا ہوتے ہیں، انہوں نے ہمیشہ نفرت نہ کرنا اور دوسروں کو معاف کرنا سکھایا۔

پی پی پی چیئرمین نے کہا کہ شہید محترمہ بینظیر بھٹو پاکستان میں جمہوری جدوجہد کی معمار تھیں، شہید بینظیر پسماندہ طبقات، اقلیتوں کے حقوق کی محافظ اور خواتین کی ترقی و خودمختاری کی عملی جدوجہد کی علمبردار تھیں۔

بینظیر بھٹو وفاق کی علامت تھیں

وزیرِ خارجہ نے کہا کہ بینظیر بھٹو وفاق کی علامت تھیں، یہ شہید محترمہ بینظیر بھٹو کے نظریے کی کامیابی ہے  آج جمہوری قوتیں ایک پیج پر ہیں، ملک کی جمہوری قوتیں ارضِ وطن کو درپیش مشکلات سے نمٹنے کے لیے پرعزم ہیں۔

بلاول بھٹو نے کہا کہ پارٹی شہید محترمہ بینظیر بھٹو کی سوچ و فلسفہ پر سختی سے کاربند رہتے ہوئے اپنی جدوجہد آگی بڑھائے گی، پیپلزپارٹی ملک سے غربت، بھوک اور بیروزگاری کے خاتمے کے لیے جدوجہد کرے گی۔

انہوں نے مزید کہا کہ ہم ملک میں روادری، مساوات اور بھائئی چارے پر قائم معاشرہ تشکیل دینے کے لیے پرعزم ہیں، پاکستان کو اسلامی دنیا کا رول ماڈل ایک مضبوط جمہوری وفاقی ملک بناکر دم لیں گے اور ہم پارلیمان، جمہوریت کو مضبوط بناکر سماجی و معاشی انصاف کو یقینی بنائیں گے۔

آصف علی زرداری کا پیغام

دوسری جانب سابق صدر آصف علی زرداری نے محترمہ بینظیر بھٹو کے پندرہویں یوم شہادت کے موقع پر انکو خراج عقیدت پیش کرتے ہوئے اپنے پیغام میں کہا کہ میں محترمہ بینظیر بھٹو شہید کے مشن کے حوالے سے نیند میں بھی غفلت نہیں کر سکتا۔

انہوں نے کہا کہ سیاست میں محترمہ بینظیر بھٹو شہید نے میری رہنمائی کی اور اب شہید محترمہ بینظیر بھٹو کی فلاسفی میری رہنمائی کر رہی ہے، آئین اور جمہوریت کی خاطر انہوں نے مشکلات کا سامنا کیا۔

محترمہ بینظیر صبر اور برداشت کی علامت تھیں

آصف زرداری نے کہا کہ محترمہ صبر اور برداشت کی علامت تھیں، بی بی نے بہادری، صبر اور برداشت سے آمروں کے خوف کے بت کو پاش پاش کیا۔

انکا کہنا ہے کہ ہم میں وہ خون نہیں جو مشکلات کی آگ کی تپش سے موم کی طرح پگھل جائے، جبر کے حالات سے گزر کر کندن بننا ہمیں محترمہ بینظیر بھٹو شہید نے سکھایا ہے۔

موجودہ اسمبلیاں اپنی مدت پوری کریں گی

انہوں نے کہا کہ جمہوریت کا تسلسل محترمہ بینظیر بھٹو شہید کا خوبصورت خواب تھا، میں نے محترمہ شہید کے اس خواب کی تکمیل کردی ہے۔

سابق صدر نے کہا کہ موجودہ اسمبلیاں اپنی مدت پوری کریں گی، ملک مضبوط اور پائیدار جمہوریت کے راستے پر گامزن ہوگا، اداروں کی طرف سے سیاست سے لاتعلقی اور صرف آئین پر عمل کرنے کا اعلان بھی محترمہ بینظیر بھٹو شہید کے خواب کی تعبیر ہے، اس سے جمہوریت کو استحکام ملے گا۔

ہم ملک کو جنت بنانے کیلئے جدوجہد کررہے ہیں

آصف زرداری نے کہا کہ ہم ملک کو جنت بنانے کیلئے جدوجہد کر رہے ہیں، عوام برسر روزگار ہو، نوجوان کو آگے بڑھنے کے مساوی موقع ہوں، خواتین ڈر اور خوف سے آزاد ہوں۔

انہوں نے مزید کہا کہ معاشرے میں عورتوں کا قابل احترام مقام ہو یہ ہوگا، محترمہ بینظیر بھٹو شہید کا پاکستان، ہم محترمہ بینظیر بھٹو شہید کے اس خواب کی تکمیل کریں گے۔