پاکستان تحریک انصاف (پی ٹی آئی) کے چیئرمین عمران خان کا جنوری کے پہلے ہفتے میں بنی گالہ منتقل ہونے کا امکان ہے۔

ذرائع نے بتایا کہ سابق وزیراعظم عمران خان جنوری کے پہلے ہفتے میں بنی گالہ واپس جانا چاہتے ہیں جبکہ بنی گالہ سیکرٹریٹ کو انتظامات مکمل کرنے کی ہدایت بھی کر دی گئی۔

ذرائع کا کہنا ہے کہ عمران خان پارٹی رہنماؤں سے مشاورت اور ڈاکٹرز کی رائے کے بعد حتمی فیصلہ کرینگے۔

خیال رہے کہ چیئرمین پی ٹی آئی عمران خان 3 نومبر کو وزیر آباد میں حملے کے بعد لاہور میں مقیم ہیں۔

اعتماد کا ووٹ، تحریک انصاف کی حکومت کو ٹف ٹائم دینے کی حکمت عملی

اس سے قبل قومی اسمبلی سے استعفوں اور وزیراعلیٰ پنجاب کے اعتماد کے ووٹ کے معاملے پر پاکستان تحریک انصاف کے چیئرمین عمران خان نے پارٹی کی سینئر قیادت کا اجلاس آج زمان پارک میں طلب کرلیا ہے۔

ذرائع کے مطابق سابق وزیراعظم عمران خان کی زیر صدارت پارٹی کی سینئر قیادت کا اجلاس آج شام 4 بجے ہوگا۔

پارٹی ذرائع نے بتایا کہ اجلاس میں حکومت مخالف جاری تحریک کا جائزہ لیا جائے گا اور قومی اسمبلی سے استعفوں کی حکمت عملی پر بھی غور کیا جائے گا۔

یہ بھی پڑھیں: مجھے ابھی الیکشن ہوتے نظر نہیں آ رہے، عمران خان

ذرائع کا کہنا تھاکہ اجلاس میں وزیراعلیٰ پنجاب کے اعتماد کے ووٹ کے حوالے سے معاملات زیر بحث آئیں گے اور 2 جنوری کو ہونے والے پی ٹی آئی اور مسلم لیگ ق کی مشترکہ پارلیمانی پارٹی کے اجلاس پر مشاورت ہوگی۔

اس کے علاوہ اجلاس میں 186 اراکین کا کورم پورا کرنے کے لیے پی ٹی آئی قیادت اہم رہنماؤں کی ڈیوٹیاں بھی تفویض کریں گے جبکہ عمران خان اجلاس میں آئندہ کی سیاسی حکمت عملی کے حوالے سے بھی آگاہ کریں گے۔

یہ بھی پڑھیں؛ پی ٹی آئی کا اجتماعی استعفوں کی منظوری پر اصرار، اسپیکر کا انکار

ذرائع نے بتایا کہ اجلاس میں ملک میں جاری معاشی، توانائی، ہوش ربا مہنگائی کے بحران سمیت دیگر معاملات پر پی ٹی آئی کے چئیرمن عمران خان گائیڈ لائن دیں گے۔

پارٹی ذرائع کا مزید کہنا تھا کہ اجلاس میں شاہ محمود قریشی، اسد عمر، فواد چوہدری، فرخ حبیب سمیت پارٹی کے سینئر رہنما شریک ہوں گے۔