سابق صدر آصف علی زرداری نے چودھری شجاعت حسین کو مشورہ دیا ہے کہ موجودہ سیاسی بحران میں بطور (ق) لیگ کے سربراہ آپ اپنا کردار ادا کریں۔

تفصیلات کے مطابق سابق صدر آصف علی زرداری نے وزیر اعظم شہباز شریف سے ملاقات کے فوری بعد پاکستان مسلم لیگ (ق) کے سربراہ چودھری شجاعت حسین سے ان کی رہائشگاہ پر خصوصی ملاقات کی۔

اس ملاقات میں دونوں رہنماؤں نے پنجاب حکومت کو تحلیل ہونے سے بچانے کے حوالے سے معاملات پر غور کیا۔

یہ بھی پڑھیں؛ شہباز، زرداری ملاقات؛ پرویز الٰہی سے براہ راست رابطہ نہ کرنے پر اتفاق

آصف علی زرداری پنجاب اسمبلی کی تحلیل روکنے کے لیے درمیانی راستہ نکالنے کا منصوبہ لیکر چودھری شجاعت کے پاس پہنچ گئے۔

میں وزیر اعلیٰ پنجاب کے خلاف تحریک عدم اعتماد پیش نہیں ہونے دوں گا

اس موقع پر چودھری شجاعت کو آصف علی زرداری نے اہم مشورے دیتے ہوئے کہا کہ پرویز الٰہی اسمبلی تحلیل نہیں کر سکتے اگر آپ انھیں ہدایات جاری کر دیں، میں وزیر اعلیٰ پنجاب کے خلاف تحریک عدم اعتماد پیش نہیں ہونے دوں گا۔

آصف زرداری نے ان سے کہا کہ پنجاب اسمبلی میں موجود (ق) لیگ کے ارکان کو اسمبلی تحلیل کرنے سے روکنے کی ہدایت جاری کریں۔

مزید پڑھیں؛ وزیر اعظم شہباز شریف کی چوہدری شجاعت حسین سے ملاقات

خاندان میں مشورہ کر کے آپ کو آگاہ کروں گا

آصف زرداری کی پیشکش پر چودھری شجاعت حسین نے پرویز الٰہی سے بات کرنے کے لیے وقت مانگ لیا اور کہا کہ خاندان میں مشورہ کر کے آپ کو آگاہ کروں گا۔

ملاقات میں طارق بشیر چیمہ بھی موجود تھے۔