چیئرمین پی ٹی آئی عمران خان نے کہا ہے کہ سال 2022 بہترین سال بھی تھا اور بدترین بھی تھا۔

تفصیلات کے مطابق سماجی رابطے کی ویب سائٹ ٹوئٹر پر چیئرمین پاکستان تحریک انصاف عمران خان نے اپنے ایک بیان میں کہا کہ سال 2022 ایک بہترین وقت بھی تھا اور بدترین وقت بھی تھا۔

انہوں نے کہا کہ اس سال ایک بہترین اقتصادی کارکردگی والی حکومت کو ایک سازش کے ذریعے ہٹایا گیا اور پاکستان کو چوروں کے ایک گروپ کے حوالے کر دیا گیا۔

ان کا کہنا تھا کہ چوروں کے گروپ نے معیشت کو تباہ کیا اور خود کو این آر او ٹو دیا جبکہ ساتھ ہی نیب قانون میں ترامیم کے ذریعے تمام وائٹ کالر مجرموں کے لیے لوٹ مار کے دروازے بھی کھل گئے۔

ان کا یہ بھی کہنا تھا کہ یہ بہترین وقت اس لئے تھا کہ میں نے پہلی بار پاکستانیوں کو ایک قوم بنتے دیکھا، تمام جماعتوں کا پی ٹی آئی کے خلاف اکٹھے ہونا، جنہیں ای سی پی اور اسٹیبلشمنٹ کی حمایت حاصل تھی لیکن بڑے پیمانے پر عوامی حمایت نے ضمنی انتخابات میں 75 فیصد کامیابی حاصل کی اور خود کو ایک حقیقی قومی پارٹی کے طور پر قائم کیا۔

یہ بھی پڑھیں؛ الیکشن کمیشن نے پھرثابت کردیا کہ وہ حکومت کی بی ٹیم ہے، عمران خان

 چیئرمین پاکستان تحریک انصاف عمران خان نے مزید کہا کہ ان حالات کے باوجود جب ملک ممکنہ ڈیفالٹ کے قریب ہے، مجھے اللہ تعالی پر بھروسہ ہے اور اپنے لوگوں پر بھی کہ 2023 کے انتخابات میں پی ٹی آئی کی مضبوط حکومت بنائے گی۔

یہ بھی پڑھیں؛ اس حکومت میں گزرتا ہر لمحہ ملک کو تباہی کی جانب لے جارہا ہے، عمران خان