تحریک انصاف کے چیئرمین عمران خان نے پارٹی رہنماؤں کو ہدایت دی ہے کہ 11 جنوری سے قبل ہر صورت اعتماد کا ووٹ لیا جائے۔

تفصیلات کے مطابق وزیراعلیٰ پنجاب کے اعتماد کے ووٹ کے معاملے پر چیئرمین پی ٹی آئی عمران خان نے پارٹی رہنماؤں کو ٹاسک سونپ دیے ہیں۔

ذرائع نے بتایا کہ اسپیکر پنجاب اسمبلی سبطین خان، پارلیمانی لیڈر عثمان بزدار، سینئر صوبائی وزیر میاں اسلم اقبال کو ٹاسک دے دیے گئے۔

پارٹی ذرائع کے مطابق صوبائی وزیر میاں محمود الرشید، چیف وہپ سید عباس علمدار کو بھی ذمہ داریاں تفویض کردی گئی ہیں۔

اس حوالے سے چیئرمین پی ٹی آئی عمران خان نے پارٹی رہنماؤں کو ہدایت دی ہے کہ گیارہ جنوری سے قبل ہر صورت اعتماد کا ووٹ لیا جائے۔

یہ بھی پڑھیں: وزیر اعلیٰ پنجاب اعتماد کا ووٹ لیں گے، پی ٹی آئی کا اعلان

عمران خان نے ہدایت دی کہ پارٹی رہنما ارکان اسمبلی سے رابطوں کا عمل جلد مکمل کریں، اعتماد کے ووٹ کے بعد پارٹی فیصلے کے مطابق  آئندہ اقدامات ہوں گے۔

چیئرمین پی ٹی آئی عمران خان نے مزید کہا کہ نو جنوری کو ہونے والے پنجاب اسمبلی اجلاس میں ارکان سے رابطوں کا عمل مکمل کر لیا جائے۔

علاوہ ازیں پارٹی رپورٹ میں بتایا گیا ہے کہ فی الحال تین ارکان اعتماد کے ووٹ میں نہیں آئیں گے، تین ارکان پارٹی پالیسی کے خلاف جاسکتے ہیں، اس وقت ایک سوستاسی ارکان کی حمایت پی ٹی آئی اور ق لیگ کو حاصل ہے۔

پنجاب اسمبلی کا اجلاس طلب، 09 جنوری کو اعتماد کا ووٹ لیئے جانے کا امکان

دوسری جانب پنجاب اسمبلی کا اجلاس نو جنوری کو طلب کرلیا گیا ہے جس میں وزیراعلیٰ کی جانب سے اعتماد کا ووٹ لئے جانے کا امکان ہے۔

 اسپیکر پنجاب اسمبلی کی منظوری کے بعد پنجاب اسمبلی کے 11 جنوری کو ہونے والے اجلاس کی تاریخ کو تبدیل کرتے ہوئے نیا نوٹیفکیشن جاری کردیا گیا۔

نئے جاری کردہ نوٹیفکیشن کے مطابق پنجاب اسمبلی کا آئندہ آجلاس 09 جنوری 2023 کو دوپہر 2 بجے منعقد ہوگا۔

ذرائع کے مطابق 09 جنوری کو ہونے والے اجلاس میں وزیراعلیٰ کی  جانب سے اعتماد کا ووٹ لئے جانے کا بھی امکان ظاہر کیا جارہا ہے۔