پاکستان تحریک انصاف (پی ٹی آئی) کے چیئرمین عمران خان نے کہا ہے کہ گورنر نے ایڈوائس میں انتخابات کی تاریخ نہ لکھ کر آئین کی خلاف ورزی کی ہے۔

تفصیلات کے مطابق پی ٹی آئی چیئرمین عمران خان نے سینئر صحافیوں سے گفتگو کرتے ہوئے کہا کہ گورنر پنجاب بلیغ الرحمن نے اسمبلی تحلیل کے بعد بھیجی گئی ایڈوائس میں انتخابات کی تاریخ نہ لکھ کر آئین کی خلاف ورزی کی جس پر ہم نے گورنر پنجاب کے اس اقدام کو عدالتوں میں چیلنج کرنے کا فیصلہ کیا ہے۔

مسلم لیگ ن  کے اندر توڑ پھوڑ کے حوالے سے سنجیدہ آوازیں سننے کو مل رہی ہیں

عمران خان نے کہا کہ اگر ملک میں صاف شفاف انتخابات نہ ہوئے تو سری لنکا جیسی صورتحال پیدا ہو سکتی ہے، اسحاق ڈار کے بارے میں صرف اتنا ہی کہوں گا کہ وہ ساری تباہی کا ذمہ دار ہے، مسلم لیگ ن  کے اندر توڑ پھوڑ کے حوالے سے سنجیدہ آوازیں سننے کو مل رہی ہیں، مسلم لیگ ن کی معروسی سیاست کے خلاف پہلی آواز چوہدری نثار نے بلند کی۔

ضرور پڑھیں؛ فوری الیکشن نہ ہوئے تو سری لنکا جیسے حالات پیدا ہو سکتے ہیں، عمران خان

پی ڈی ایم مکمل طور پر فیل ہو چکی ہے

ان کا کہنا تھا کہ اگر جنرل الیکشن کی تاریخ کا اعلان نہ بھی ہوا تو سڑکوں پر احتجاج کا کوئی آپشن زیر غور نہیں، ہر گزرتے دن کے ساتھ پی ڈی ایم مشترکہ طور پر عوام کے سامنے بے نقاب ہو رہی ہے، پی ڈی ایم مکمل طور پر فیل ہو چکی، ان کے پاس عوام کو دینے کے لئے کچھ نہیں، پی ڈی ایم نے مشترکہ طور پر عوام کے وسائل کو اپنے مفادات کے لئے استعمال کیا۔

نواز شریف قطعا سیاستدان نہیں

عمران خان نے کہا کہ صرف تحریک انصاف کی حکومت ہی ملک کو ان بحرانوں سے نجات دلا سکتی ہے، پنجاب اسمبلی کی تحلیل پی ڈی ایم کیلئے ایک ایسا شاٹ ہے جس کی گونج صدیوں تک انہیں سنائی دے گی، نواز شریف قطعا سیاستدان نہیں۔

اگر مجھے نااہل کر بھی دیا تب بھی لوگ تحریک انصاف کو ہی ووٹ دیں گے

چیئرمین پارٹی نے کہا کہ میرے پاس ابھی بہت سے ایسے کارڈ باقی ہیں کہ جب کھیلوں گا تو پی ڈی ایم کے رونگٹھے کھڑے ہو جائیں گے، اگر مجھے نہ اہل کر بھی دیا تو پھر بھی لوگ تحریک انصاف کے نظریے کو ووٹ دیں گے۔