پشاور: وزیراعلی خیبر پختونخوا محمود خان نے کہا ہے کہ اسمبلی تحلیل کرنے کی سمری آج شام گورنر کو بھیج دونگا۔

وزیر اعلیٰ محمود خان نے صوبائی کابینہ کے 86واں اجلاس سے خطاب کرتے ہوئے کہا کہ خیبرپختونخوا اسمبلی کے تحلیل کے لیے سمری آج ارسال کریں گے، ملکی مفاد میں خیبرپختونخوا اسمبلی آج ہی تحلیل کریں گے۔

انہوں نے کہا کہ گزشتہ چار سال انتہائی خوش اسلوبی سے گزرے، تمام کابینہ اراکین، حکومتی اور اپوزیشن اپم پی ایز اور بیوروکریسی کا شکرگزار ہوں، خیبرپختونخوا کے عوام کا خصوصی شکریہ ادا کرتا ہوں جنہوں نے مجھ پر اعتماد کیا۔

وزیراعلیٰ کی کرسی امانت تھی جو واپس کررہے ہیں

انہوں نے کہا کہ یہ اسمبلی اور وزیراعلیٰ کی کرسی ان کی امانت تھی جو واپس کر رہے ہیں، میرے حوالے سے اسمبلی نہ توڑنے اور گروپ بندی کی خبریں بے بیناد اور مخالفین کا پرویگنڈا ہے جو آج ناکام ہو جائے گا۔

وزیراعلیٰ کا کہنا ہے کہ اسمبلی تحلیل کرنے کی سمری آج شام گورنر کو بھیج دوں گا،  کابینہ کا آج کا اجلاس آخری ہے، شام تک سمری تیار ہوگی، اسمبلی کی تحلیل کے حوالے سے پارٹی میں کوئی اختلاف نہیں، حکومت عمران خان کی امانت ہے ان کے حکم پراسمبلی تحلیل کررہے ہیں۔

محمود خان نے کہا کہ تمام ارکان اور پارٹی قائدین متفق ہیں اور الیکشن کی تیاریوں کے لیے اپنے اپنے علاقوں میں جا رہے ہیں

انہوں نے مزید کہا کہ ایسے غیر ضروری بیانات پارٹی میں اختلافات پیدا نہیں کر سکتے، کل سے مختلف میڈیا ایسی بے بیناد خیریں چلا رہے ہیں جو ایک سوچے سمجھے منصوبے کے تحت ہے۔

واضح رہے کہ  اپوزیشن لیڈر اکرم درانی نے وزیراعلیٰ کے پی محمود خان پر اسمبلی نہ توڑنے کے لیے منتیں کرنے کا الزام بھی عائد کر رکھا ہے۔

دو روز قبل وزیراعلیٰ خیبرپختونخوا محمود خان نے پشاور پریس کلب میں حلف برداری کی تقریب سے خطاب کرتے ہوئے کہا تھا کہ  بطور وزیراعلٰی یہ میرا آخری خطاب ہے۔ ہم الیکشن میں جائیں گے، ہمیں اللہ سے امید ہے اگلی بار دو تہائی اکثریت سے آئیں گے۔

محمود خان نے کہا کہ گورنرکو کے پی اسمبلی تحلیل کرنے کی سمری بھیجی جائے گی، سمری بھیجیں گے تو گورنرکو دستخط کرنا پڑیں گے، گورنر خیبرپختونخوا کے پاس کوئی اختیارات نہیں ہیں۔

انہوں نے کہا کہ ہار جیت کھیل کا حصہ ہے، آپ لوگوں کیساتھ ملاقات آج آخری ہے، اس کے بعد ہم نے نئے الیکشن میں جانا ہے، انشاء اللہ دوبارہ اس سے بھی طاقت میں آئیں گے۔