پنجاب اسمبلی کی تحلیل کا گزٹ نوٹیفکیشن جاری کردیا گیا ہے۔

تفصیلات کے مطابق محکمہ قانون پنجاب کی جانب سے پنجاب اسمبلی کی تحلیل کا باضابطہ نوٹیفکیشن جاری کیا گیا ہے۔

جاری کردہ نوٹیفکیشن میں بتایا گیا کہ پنجاب اسمبلی وزیر اعلیٰ کی ایڈوائس ہر تحلیل ہوگئی ہے، اسمبلی کی تحلیل 14 جنوری کو رات 10 بجکر 10 منٹ سے ہوگی۔

پنجاب اسمبلی از خود تحلیل ہوگئی، گورنر نے سمری پر دستخط نہیں کیے

گورنر بلیغ الرحمان کے دستخط نہ کرنے کے باوجود پنجاب اسمبلی ازخود تحلیل ہوگئی۔

گورنر پنجاب بلیغ الرحمان نے وزیراعلیٰ کی سمری پر دستخط کرنے سے انکار کر دیا تاہم آئین و قانون کے مطابق پنجاب اسمبلی 48 گھنٹے گزرنے کے بعد تحلیل ہو گئی۔ چوہدری پرویز الہیٰ اب 8 روز کے لئے نگران وزیراعلیٰ ہوں گے۔

مزید پرھیں: اسمبلی کی تحلیل کے بعد پرویزالہیٰ کب تک نگران وزیراعلیٰ کے فرائض سرانجام دینگے؟

گورنر پنجاب محمد بلیغ الرحمان نے پنجاب اسمبلی کی تحلیل کے بعد ایک متفقہ نام کے لیے وزیراعلیٰ پنجاب اور قائد حزب اختلاف پنجاب اسمبلی کو مراسلے جاری کر دیے۔

نگران وزیراعلیٰ کی تقرری کے عمل کا آغاز

آئین کے آرٹیکل 224 اے کے تحت جب اسمبلی تحلیل ہو جائے تو نگران وزیراعلیٰ کے قیام کا عمل شروع ہوجائے گا چوہدری پرویز الہیٰ نگران وزیر اعلٰی کے لئے اپوزیشن لیڈر حمزہ شہباز کو نگران وزیر اعلیٰ کےلئے خط لکھیں گے اور اس حوالے سے تین نام پرویز الہیٰ اور تین نام حمزہ شہباز دیں گے۔

اسمبلی تحلیل کے بعد نگران وزیراعلیٰ کو 3 دن کے اندر اندر نامزد کرنا ہوگا جبکہ قائد ایوان اور قائد حزب اختلاف باہمی مشاورت سے نگران وزیراعلیٰ کو نامزد کریں گے، اگر دونوں میں اختلاف ہو جائے تو اسپیکر فوری طور پر ایک کمیٹی تشکیل دے گا۔

یہ بھی پڑھیں؛ پنجاب اسمبلی کی تحلیل کے فوراً بعد کے پی اسمبلی تحلیل ہوگی

کمیٹی 6 رکنی ہوگی جس میں 3 اپوزیشن اور 3 حکومت کے ارکان اسمبلی شامل ہوں گے، کمیٹی 3 روز میں وزیراعلیٰ اور قائد حزب اختلاف کے بھجے گئے ناموں میں ایک کا چناؤ کریں گے۔

3  روز میں اگر کمیٹی کسی ایک نام پر اتفاق رائے نہ کر سکی تو پھر معاملہ چیف الیکشن کمشنر کے پاس جائے گا، جو نام قائد ایوان اور قائد حزب اختلاف نے دیے ہوں گے وہ چیف الیکشن کمشنر بھیجے جائیں گے، چیف الیکشن کمشنر 2 روز میں ان میں سے کسی ایک کو نگران وزیراعلیٰ نامزد کریں گے۔

نگران سیٹ اپ کیلئے مشاورت

دوسری جانب پنجاب میں نگران سیٹ اپ کیلئے عمران خان نے آج پرویز الہٰی سے ملاقات کا فیصلہ کیا ہے، عمران خان اور پرویز الہٰی کی آج زمان پارک میں ملاقات ہوگی۔

ملاقات میں نگران سیٹ اپ کیلئے ناموں پر مشاورت ہوگی، عمران خان مشاورت کے بعد پرویز الہٰی کو نگران سیٹ اپ کیلئے نام دیں گے۔

مزید پڑھیں: (ن) لیگ کا پنجاب اسمبلی کی تحلیل میں رکاوٹ نہ ڈالنے کا فیصلہ