پاکستان تحریک انصاف کے رہنما تیمور سلیم جھگڑا نے کہا ہے کہ حکومت کی جانب سے انتخابات میں تاخیر کر کے ملک سے کھیلا جارہا ہے۔

پریس کانفرنس کرتے ہوئے پی ٹی آئی رہنما کا کہنا تھا کہ گورنر کے پی الیکشن سے بھاگ رہے ہیں جبکہ گورنر 90 روز میں انتخابات کی تاریخ دینے کا پابند ہے۔

انہوں نے کہا کہ اسمبلیوں کی تحلیل کے بعد 90 روزمیں انتخابات ضروری ہیں لیکن یہ نگراں کابینہ میں بی ٹیم بنا کر بھی الیکشن  سے بھاگ رہے ہیں۔

انہوں نے مزید کہا کہ اسحاق ڈاردعویٰ کرتے تھے کہ ڈالر 200 روپے سے نیچے لاؤں گا لیکن حکومت نے مصنوعی طریقے سے ڈالر کو کنٹرول کیا تھا۔

یہ بھی پڑھیں: اگر الیکشن نہ ہوئے تو شاید وہ کچھ ہوجائے جو ملک برداشت نہیں کر پائے، تیمور سلیم جھگڑا

تیمور سلیم جھگڑا کا کہنا تھا کہ مفتاح اسماعیل کے مطابق 3 ماہ میں 3 ارب ڈالر کا نقصان ہوا ہے جبکہ مذاکرات میں آئی ایم ایف پٹرول 50 ، ڈیزل 35 روپے مہنگا کرنے کا کہے گا۔

ان کا کہنا تھا کہ ایکسپورٹ میں ایک ارب ڈالر کا ماہانہ نقصان ہورہا ہے جبکہ ایل سیز نہیں کھول رہے، کینسر و دیگر امراض کی ادویات بھی نہیں مل رہیں ہیں۔

اس موقع پر شوکت یوسفزئی کا کہنا تھا کہ ڈالرکی قیمت میں اضافے سے مہنگائی کا نیا طوفان آئے گا اور مہنگائی کا طوفان ناقابل برداشت ہوگا۔

انہوں نے کہا کہ پی ٹی آئی کو دیوار سے لگانے کی کوشش کی تو مشکلات ہوں گی کیونکہ پی ٹی آئی پورےملک کی جماعت ہے اور اگر کرپشن کے ثبوت موجود ہیں تو کارروائی کریں ڈرائیں مت۔