سابق وفاقی وزیر اور پی ٹی آئی کے وائس چیئرمین شاہ محمود قریشی نے کہا ہے کہ پی ڈی ایم کے پاس پاکستان کیلئے بڑے فیصلے لینے کا مینڈیٹ نہیں ہے۔

بول نیوز سے خصوصی گفتگو کرتے ہوئے شاہ محمود قریشی نے کہا ہے کہ عمران خان نے کہا تھا مسائل کا واحد حل انتخابات ہیں لیکن پی ڈی ایم حکومت الیکشن نہیں چاہتی ہے۔

یہ بھی پڑھیں: استعفے قبول کرنے ہیں تو سب قبول کریں، شاہ محمود قریشی

انہوں نے کہا کہ عوام کا سامنا کرنے کے لیے تیار نہیں ہے اور 10 ماہ کی کارکردگی ثبو ت ہے کہ حکومت ناکام ہوئی ہے، ان کے  پاس کوئی ایکشن پلان نہیں ہے۔

انہوں نے مزید کہا کہ حکومت ملک کو سیاسی اور معاشی استحکام نہیں دے سکی ہے جس کی وجہ سے عوام کے پاس جانا ضروری ہے۔

شاہ محمود قریشی نے کہا کہ حکومت کا استعفوں پر دہرا معیار ہے جبکہ 125 استعفے ان کے پاس تھے، استعفے منظور کرنا چاہتے ہیں تو سب کے کرتے۔

ملک میں عام انتخابات جلد ہونگے

دوسری جانب رہنما پی ٹی آئی اسد قیصر نے کہا ہے کہ ملک میں عام انتخابات جلد ہونگے جس میں عمران خان بھاری اکثریت سے کامیاب ہونگے۔

انہوں نے کہا کہ جب ہم نے اسپیکر قومی اسمبلی کو استعفے منظور کرنے کا کہا تھا تو اسپیکر نے کہا تھا ایک ایک کو بلا کر استعفے منظور کروں گا لیکن اب آصف زرداری کی ہدایت پر استعفے منظور کیے گئے ہیں۔

حکومت ہمارے بچھائے جال میں خود پھنس گئی

علاوہ ازیں رہنما پی ٹی آئی فواد چوہدری نے کہا ہے کہ حکومت نے بوکھلاہٹ میں استعفے منظور کیے اور ہمارے بچھائے گئے جال میں خود پھنس گئے ہیں۔

انہوں نے کہا کہ ہم چاہتے تھے زیادہ سےزیادہ نشستوں پر انتخابات ہوں اور امید ہے کہ پورے ملک میں انتخابات کرانے میں کامیاب ہوجائیں گے۔

انہوں نے مزید کہا کہ عمران خان نے اپنا وعدہ پورا کردیا ہے، اب وہ فروری کے پہلے ہفتے میں اسٹریٹ موومنٹ کے لئے باہرنکلیں گے