پاکستان تحریک انصاف (پی ٹی آئی) کے چیئرمین عمران خان نے کہا ہے کہ ہم نگران حکومت کیلئے بہترین شہرت و صلاحیت کی حامل شخصیات کو نامزد کر رہے ہیں۔

تفصیلات کے مطابق نگران وزیر اعلیٰ کی نامزدگی کے حوالے سے تحریک انصاف کی پارلیمانی کمیٹی کے اراکین نے چیئرمین پی ٹی آئی عمران خان سے خصوصی ملاقات کی جس میں پنجاب میں نگران وزیر اعلیٰ کی نامزدگی کے حوالے سے اہم امور پر تفصیلی مشاورت ہوئی۔

اس موقع پر نگران وزیر اعلیٰ کیلئے احمد نواز سکھیرا، سابق چیف سیکرٹری پنجاب نوید چیمہ اور نصیر خان کے ناموں پر تفصیلی غور ہونے کے بعد چیئرمین کی جانب سے حتمی مشاورت کے بعد دو نام پارلیمانی کمیٹی کو بھیجے جانے پر اتفاق ہوا۔

ملک انتخابات میں تاخیر کا کسی طور متحمل نہیں

عمران خان کا اس موقع پر کہنا تھا کہ ملک انتخابات میں تاخیر کا کسی طور متحمل نہیں، نہایت حسّاس ملکی صورتحال میں انتخابات کی شفافیت کو خطرے میں ڈالنا قوم سے دشمنی کے مترادف ہے۔

ان کا کہنا تھا کہ صاف، شفاف انتخابات کا انعقاد سنجیدہ ترین معاملہ ہے، بہترین ساکھ اور صلاحیت کی حامل نگران حکومت ہی اس ذمہ داری کیلئے موزوں ہے۔

تحریک انصاف بہترین شہرت و صلاحیت کی حامل شخصیات کو نامزد کر رہی ہے

انہوں نے مزید کہا کہ تحریک انصاف بہترین شہرت و صلاحیت کی حامل شخصیات کو نامزد کر رہی ہے، عوام کا سامنا کرنے سے خوفزدہ گروہ کو مزید خرابیوں کی اجازت نری حماقت ہو گی، نگران حکومتوں کے قیام کا آئینی تقاضا سنجیدگی سے پورا کر کے عوام کو انتخاب کے ذریعے فیصلے کا بلاتاخیر حق دیا جائے۔

ملاقات کے دوران مرکزی سینئر نائب صدر فواد چوہدری بھی موجود تھے۔

ضرور پڑھیں؛ عمران خان قومی اسمبلی کے 7 حلقوں سے کامیاب قرار