قومی اسمبلی کے حلقے این اے 193 ضلع راجن پور کی تحصیل جام پور میں ضمنی الیکشن کے لئے  پولنگ  کا وقت ختم ہونے میں 1 گھنٹہ باقی رہ گیا ہے۔

تفصیلات کے مطابق جام پور میں ضمنی انتخابات کے لئے پولنگ کا عمل شروع ہوگیا ہے، پولنگ اپنے مقررہ وقت صبح 8 بجے سے شام 5 بجے تک بغیر کسی وقفے کے جاری رہے گی۔

جام پور میں ضمنی انتخابات کا میلہ
NA-193 میں پولنگ کا عمل شروع#BOLNews #ByElections pic.twitter.com/FfiDJR4asl

— BOL Network (@BOLNETWORK) February 26, 2023

ضمنی الیکشن میں شیر کے نشان پر عمار اویس لغاری، بلے کے نشان پر محسن لغاری، تیر کے نشان اختر حسن گورچانی اور کرین کے نشان پر محمد محمود آمنے سامنے ہیں جبکہ مختلف نشان پر 7 آزاد امیدوار بھی مقابلے میں شامل ہیں۔

الیکشن کمیشن کے مطابق ضمنی الیکشن میں 3 لاکھ 79ہزار، 204 رجسٹرڈ ووٹرز اپنا حق رائے دہی استعمال کریں گے تاہم  2لاکھ 64 ہزار 95 مرد ووٹر اپنا حق رائے دہی استعمال کریں گے جبکہ 1لاکھ 72 ہزار 709 خواتین اپنا ووٹ کاسٹ کریں گی۔

این اے 193 کے لیے کل 237پولنگ اسٹیشن بنائے گئے ہیں،  مردوں کے 80، خواتین کے 77 جبکہ 80 کمبائنڈ پولنگ اسٹیشن بنائے گئے ہیں۔

اس کے علاوہ 237 پولنگ اسٹیشن پر 711پولنگ بوتھ بنائے گئے ہیں مردوں کے لئے 387 جبکہ خواتین کے لیے 324 پولنگ بوتھ بنائے گئے ہیں۔

خیال رہے کہ پولنگ اسٹیشن میں موبائل لے جانے کی مکمل پابندی ہوگی۔

سیکیورٹی انتظامات

پولیس کی جانب سے سیکیورٹی کے سخت انتظامات کیے گئے ہیں۔

ترجمان پولیس نے بتایا کہ ضمنی الیکشن پر 2500 سے زائد پولیس اہلکار و افسران ڈیوٹی سرانجام دیں گے جبکہ پاک آرمی اور رینجرز کے جوان پولیس کی مدد کے لیے ساتھ ہونگے۔

ترجمان کا کہنا ہے کہ حلقے میں 237 پولنگ اسٹیشنز بنائے گئے ہیں، 169 بی گریڈ جبکہ 69 پولنگ اسٹیشنز کو حساس قرار دیا گیا ہے۔

واضح رہے کہ قومی اسمبلی کے حلقے این اے 193 کی نشست تحریک انصاف کے ایم این اے سردار جعفر لغاری کے انتقال پر خالی ہوئی تھی۔