پاکستان تحریک انصاف کے رہنما علی زیدی نے کہا ہے کہ مرضی کے نتائج دینے ہیں تو الیکشن نہ کرائیں۔

سابق وفاقی وزیر اور رہنما پی ٹی آئی علی زیدی نے الیکشن کمیشن کے باہر میڈیا سے گفتگو کرتے ہوئے کہا کہ میں نے بلدیاتی انتخابات میں دھاندلی کے خلاف ایک خط لکھا تھا، بلدیاتی انتخابات کے پہلے مرحلے میں جو تماشا ہوا سب نے دیکھا۔

انہوں نے کہا کہ میڈیا پر خبر چلی کہ پولیس اور ڈاکوؤں کے درمیان مذکرات کے بعد الیکشن باکسز واپس کیے گئے، پیپلزپارٹی نے پہلے بہانہ بنا کر بلدیاتی الیکشن ملتوی کیا، ایم کیو ایم کے احتجاج کے بعد پھر الیکشن کروایا گیا۔

علی زیدی نے کہا کہ کئی یوسیز ایسی ہیں جہاں فارم 11 کے مطابق پی ٹی آئی جیتی ہے، ایک یو سی تو ایسی ہے جہاں 700 ووٹ مسترد ہوئے جبکہ کل ووٹرز ہی 1100 تھے۔

امید ہے الیکشن کمیشن انصاف فراہم کرے گا

سابق وفاقی وزیر نے کہا کہ یہ پورا الیکشن آر اوز نے مینیج کیا ہوا تھا، اگر ایسے ہی کرنا ہے تو پھر اتنا خرچ کر کے الیکشن کروانے کی کیا ضرورت ہے۔

انہوں نے مزید کہا کہ الیکشن کمیشن نے نتائج روک کر 22فروری کو طلب کیا ہے، ہم الیکشن کمیشن سے امید کرتے ہیں کہ یو سیز کے الیکشن میں انصاف کرے گی۔

اس سے قبل سابق وفاقی وزیر اور رہنما پی ٹی آئی علی زیدی نے اپنے ایک بیان میں کہا تھا کہ اسحاق ڈار معیشت کے گرونانک بن کر آئے تھے  اور اب انہوں نے کہا ہے معیشت کا تحفظ اللہ تعالیٰ کرے گا۔

علی زیدی نے کہا کہ یہ لوگ نہیں جانتے کہ حکومت کیسے چلے گی اور حکومت چلانی کیسے ہے، پاکستان کی اکنامک صورتحال کے متعلق ان کو کچھ نہیں معلوم ہے، ان کی کوئی اسٹڈی نہیں ہے اور نہ ان کے پاس کوئی پلان ہے۔

یہ بھی پڑھیں: ہم آخری گیند تک لڑتے ہیں، علی زیدی

علی زیدی کا کہنا تھا کہ اسحاق ڈار نے وزارت میں بڑے گونانک بن کر آئے تھے لیکن جب سے وہ آئیں ہیں معیشت کی تباہی ہوئی ہے اور اب کہتے ہیں کہاللہ پاکستان کی معیشت کی حفاظت کرے گا۔

انہوں نے کہا کہ ان لوگوں نے پورے ملک کا بیڑا غرق کردیا ہے، معیشت پوری طرح بیٹھ گئی ہے، ایکسپوٹرز بھی سارے پھنسے ہوئے ہیں، ان لوگوں نے اس ملک کو ادھر لے جاکر کھڑا کردیا ہے جہاں سے واپسی کا کوئی راستہ ہی نہیں ہے۔