امیر جماعت اسلامی کراچی حافظ نعیم الرحمان نے کہا ہے کہ ہم اپنے مینڈیٹ پر قبضہ نہیں ہونے دیں گے۔

جماعت اسلامی کراچی کے امیر حافظ نعیم نے میڈیا سے گفتگو کرتے ہوئے کہا کہ ہم نے تمام تفصیلات الیکشن کمیشن میں پیش کی ہیں، الیکشن کمیشن میں پریذائیڈنگ افسر بھی بلائے گئے تھے۔

انہوں نے کہا کہ کراچی بلدیاتی الیکشن میں دھوکے بازی کی گئی، امید ہے چیف الیکشن کمشنر حق کا فیصلہ کرینگے، ہم اپنے مینڈیٹ پر قبضہ نہیں ہونے دینگے۔

حافظ نعیم الرحمان نے گزشتہ روز اپنے ایک بیان میں کہا تھا کہ کل خود جاکر اسلام آباد میں کراچی کا مقدمہ لڑونگا، جو بھی شریک جرم ہوگا بھرپور طریقے سے بے نقاب کرینگے اگر گرفتار کرتے ہیں تو کرلیں خاموش تماشائی نہیں بنیں گے۔

امیر جماعت اسلامی کراچی نے کہا کہ بلدیاتی الیکشن کے لئے کوئی بھی تیار نہیں ہوتا ہے جبکہ آئین میں بھی بلدیات کے حوالے سے چند آرٹیکل ہی موجود ہے۔

ان کا کہنا تھا کہ ایم کیو ایم نے وزارتوں کے لئے کراچی کا سودا کیا اور الیکشن کمیشن ان سب کا آلہ کار بنا رہا کہ کسی طرح سے الیکشن نہ ہو۔

مزید پڑھیں: گرفتار کرتے ہیں تو کرلیں خاموش تماشائی نہیں بنیں گے، حافظ نعیم الرحمان

انہوں نے کہا کہ ان تمام تر حربوں کے باوجود بھی جماعت اسلامی سب سے آگے رہی لیکن کراچی کے ساتھ ہمیشہ کی طرح بلدیاتی الیکشن میں بھی مذاق کیا گیا، ایک مہینہ گزر جانے کے باوجود بھی تسلی بخش سماعت نہیں ہورہی۔

انہوں نے مزید کہا تھا کہ الیکشن کمیشن پپپلز پارٹی کے ساتھ شریک جرم ہے اور نتائج کو مزید روکنے کے لئے مختلف حربے استعال کیے جارہے ہیں لیکن جو بھی شریک جرم ہوگا بھرپور طریقے سے بے نقاب کریں گے۔