سابق وفاقی وزیر شاہ محمود قریشی نے کہا ہے کہ عمران خان کی گرفتاری بہت بڑی سیاسی غلطی ہوگی۔

اپنے ایک بیان میں شاہ محمود قریشی نے کہا ہے کہ تجربہ کار ٹیم 6 ماہ میں سب ٹھیک کرنے کا دعویٰ کررہی تھی لیکن اب حکومت پورےنظام کو داؤ پر لگارہی ہے۔

انہوں نے کہا کہ ہم حکومتی ہتھکنڈوں کا مقابلہ کرتے رہیں گے لیکن عمران خان کی گرفتاری بہت بڑی سیاسی غلطی ہوگی۔

انہوں نے مزید کہا کہ ملک میں خاص کیفیت پیدا کرنے کی کوشش ہورہی ہے، اندازہ لگا سکتے ہیں حکومت عمران خان سے کتنی خوفزدہ ہے۔

یہ بھی پڑھیں: تحریک انصاف قانون اور آئین کیلئے جدوجہد کر رہی ہے، شاہ محمود قریشی

دوسری جانب اسد قیصر نے کہا کہ الیکشن شیڈول کا اعلان نہ ہوا تو جیل بھر وتحریک شروع کریں گے، پی ٹی آئی مہنگائی کیخلاف مارچ کریگی اور ہر شہر میں مہنگائی کیخلاف مارچ کیا جائےگا۔

امپورٹڈ ٹولہ سیاسی میدان میں مقابلہ نہیں کرسکتا

بعدازاں فیاض چوہان نے کہا کہ امپورٹڈ حکومت کی جانب سے عدالتی احکامات پرعملدرآمد نہیں کیا گیا، عدالت نے پی پی اور ن لیگ فنڈنگ کیس کا فیصلہ دینے کا حکم دیا تھا لیکن تاحال کوئی فیصلہ نہیں کیا گیا۔

انہوں نے کہا کہ امپورٹڈٹولہ سیاسی میدان میں مقابلہ نہیں کرسکتا لیکن پی ٹی آئی والے گرفتاری کیلئے تیار ہیں۔

حکومت کا ایجنڈا ملک میں انتشار پیدا کرنا ہے

فیصل چوہدری نے اپنے ایک بیان میں کہا کہ عمران خان کی زندگی کوخطرات ہیں، ان کوکچھ ہواتوذمہ دارکون ہوگا۔

ان کا کہنا تھا کہ حکومت کا ایجنڈا ملک میں انتشار پیدا کرنا ہے، غیرذمہ دار حکومت عمران خان کو گرفتار کرسکتی ہے۔

حکومت عمران خان کو گرفتار کرنا چاہتی ہے 

علی نواز اعوان نے کہا ہے کہ ہائیکورٹ نےبینکنگ کورٹ کو22فروری تک روک دیا ہے لیکن ان کی حفاظتی ضمانت کےلیےلاہور ہائیکورٹ جائیں گے۔

انہوں نے بتایا کہ ڈاکٹرز کا کہنا ہے عمران خان کے زخم ٹھیک نہیں ہوئے تاہم حکومت عمران خان کو گرفتار کرنا چاہتی ہے۔

عمران خان پاکستانی عوام کے دلوں میں رہتا ہے

سابق گورنر سندھ عمران اسماعیل نے کہا ہے کہ حکومت نے عمران خان کو گرفتار اور نااہل کرنے کا منصوبہ بنایا ہوا ہے لیکن گرفتاری اور نااہلی دونوں معاملات کو دیکھ لیں گے۔

انہوں نے کہا کہ عمران خان پاکستانی عوام کے دلوں میں رہتا ہے، انھوں نے ایک مرتبہ عمران خان پر حملہ کرنے کی کوشش کی اللہ نے بچالیا ہے۔

خیال رہے کہ انساد دہشتگردی عدالت کی جانب سے ضمانت مسترد ہونے کے بعد ایف آئی اے  کمرشل بینکنگ سرکل اسلام آباد کی جانب سے سابق وزیراعظم اور چیئرمین پی ٹی آئی کی گرفتاری کے امکانات ہیں ۔