معروف سماجی و سیاسی شخصیات چوہدری سعید سدھو اور شفقت امین نے ساتھیوں سمیت پاکستان  تحریک انصاف (پی ٹی آئی) میں باضابطہ طور پر شمولیت کا اعلان کردیا ہے۔

تفصیلات کے مطابق تحریک انصاف کے چیئرمین عمران خان سے لاہور کی معروف سماجی و سیاسی شخصیات چوہدری سعید سدھو اور شفقت امین کی زمان پارک میں ملاقات ہوئی۔

ملاقات کے دوران سعید سدھو، شفقت امین اور وفد نے چیئرمین عمران خان کی قیادت اور تحریک انصاف کے منشور پر مکمل اعتماد کا اظہار کیا۔

وفد نے حقیقی آزادی کی تحریک پر مکمل اعتماد کا اظہار کیا اور جیل بھرو تحریک کے حوالے سے اپنا بھرپور کردار ادا کرنے کا عزم بھی کیا۔

دوسری جانب چیئرمین تحریک انصاف عمران خان نے معروف سماجی و سیاسی شخصیات کی تحریک انصاف میں شمولیت کا خیر مقدم کیا۔

اس موقع پر مرکزی سینئر نائب صدر فواد چوہدری اور جیل بھرو تحریک کے فوکل پرسن و رہنما تحریک انصاف اعجاز چوہدری بھی موجود تھے۔

علاوہ ازیں ملاقات میں سعید مشتاق، محمد یونس، محمد خالد، شاہد طالب، سلطان گولڈن اور منشاء سندھو نے بھی شرکت کی۔

واضح رہے کہ اس سے قبل چوہدری پرویز الہیٰ کی جانب سے ساتھیوں سمیت پاکستان تحریک انصاف میں شامل ہونے کا اعلان کیا گیا تھا۔

اس موقع پر چوہدری پرویز الہیٰ کا کہنا تھا کہ ہم عمران خان کے شکر گزار ہیں، ہم نے ہر مشکل وقت میں عمران خان اور تحریک انصاف کا ساتھ دیا، ہم نے اپنی وزارت اعلی میں ڈلیور کرکے دکھایا۔

انہوں نے کہا کہ ہم نے عمران خان کے کہنے پر اسمبلی تحلیل کی، ہم ہر وہ کام کریں گے جس میں ملک اور صوبے کا فائدہ ہو، ہمارے کئی ترقیاتی کام اس حکومت نے بند کردیے ہیں۔