پنجاب فلور ملز ایسوسی ایشن کی جانب سے پنجاب بھر میں کل سے ہڑتال کا اعلان کردیا گیا ہے۔

تفصیلات کے مطابق سیکرٹری خوراک پنجاب کے نامناسب رویے کے خلاف فلور ملز مالکان نے 13 فروری سے ہڑتال کا اعلان کر دیا ہے۔

اس حوالے سے پاکستان فلور ملز ایسوسی ایشن پنجاب کے چیئرمین افتخار مٹو نے اپنے بیان میں کہا کہ سیکرٹری فوڈ پنجاب کی جانب سے فلور ملز کے خلاف کاروائیاں بلا جواز ہیں، ان کے رویے کی وجہ سے مارکیٹ میں آٹے کی سپلائی شارٹ ہونے کا خدشہ ہے۔

افتخارمٹو نے مزید کہا کہ مطالبات نہ مانے گئے تو 13 فروری بروز پیر سے صوبہ بھر میں فلور ملز گندم کا کوٹہ نہیں اٹھائیں گی اور 14 فروری سے مارکیٹ میں آٹے کی سپلائی بند کردی جائے گی۔

سیکرٹری خوراک اور فلور ملز ایسوسی ایشن کے درمیان تنازع مزید بڑھ گیا

سیکرٹری خوراک اور فلور ملز ایسوسی ایشن کے درمیان تنازع مزید بڑھ گیا ہے۔

ذرائع نے بتایا کہ محکمہ خوراک نے ایس او پیز کی خلاف ورزی پر 100 سے زائد ملوں کا گندم کوٹہ معطل کر دیا اور 10 ملز مالکان کے خلاف مقدمہ درج کرانے کی ہدایت کردی۔

اس موقع پر پنجاب فلور ملز ایسوسی ایشن نے کہا کہ محکمہ خوراک گندم فروخت کرنے والی فلورملز کے خلاف ثبوت لائیں، ان کے خلاف محکمہ کے ساتھ کھڑے ہونگے، آٹے کی فروخت کیلئے ٹرکنگ اسٹیشن ختم کیے جائیں اور دکانوں پر سیل پوائنٹ قائم کیے جائیں۔

دوسری جانب محکمہ خوراک پنجاب ڈی جی خوراک شوذب سعید نے کہا کہ جو ایس او پی کی خلاف ورزی کر رہے ہیں، انکے خلاف کارروائی کر رہے ہیں، سرکاری گندم اس کو ہی ملے گی جو ایس او پی کے مطابق کام کرے گا۔

ڈی جی فوڈ پنجاب نے مزید کہا کہ جلد معاملات طے ہو جائیں گے، یہ ہرتال کی کال بلاجواز ہے، بلیک میلنگ میں نہیں آئیں گے۔

پنجاب میں فلور ملز مالکان کو گرفتار کرنے کا فیصلہ

اس سے قبل محکمہ خوراک نے پنجاب میں فلور ملز مالکان کو گرفتار کرنے کا فیصلہ کرلیا تھا اور فوڈ کنٹرولر راولپنڈی کو سات فلور ملز ایسوسی ایشن کے عہدیداروں کے خلاف کارروائی کی ہدایات بھی جاری کردی تھیں۔

محکمہ خوراک پنجاب کی جانب سے خواجہ عنران، طارق سیتھی، صمد قریشی، قیوم سیٹھی اور ریاض اللہ خان کے خلاف کارروائی کا حکم دے دیا گیا تھا۔

واضح رہے کہ پنجاب فلور ملز ایسوسی ایشن نے گزشتہ روز ہی 13 فروری سے ہرتال کا اعلان کردیا تھا۔