پاکستان تحریک اصاف میں شمولیت کے بعد ق لیگ کے رہنماؤں نے جیل بھرو تحریک میں شامل ہونے کا اعلان کردیا ہے۔

اس حوالے سے رہنما زبیر احمد آغا، عبدالواسع خان آج کارکنوں کے ہمراہ شارع قائداعظم پہنچیں گے۔

خیال رہے کہ گزشتہ روز چوہدری پرویز الہیٰ نے ساتھیوں سمیت پاکستان تحریک انصاف میں شامل ہونے کا اعلان کیا تھا ۔

چوہدری پرویز الہیٰ کا کہنا تھا کہ ہم عمران خان کے شکر گزار ہیں، ہم نے ہر مشکل وقت میں عمران خان اور تحریک انصاف کا ساتھ دیا، ہم نے اپنی وزارت اعلی میں ڈلیور کرکے دکھایا۔

یہ بھی پڑھیں: پرویز الہیٰ کا ساتھیوں سمیت پی ٹی آئی میں شمولیت کا اعلان

انہوں نے کہا کہ ہم نے عمران خان کے کہنے پر اسمبلی تحلیل کی، ہم ہر وہ کام کریں گے جس میں ملک اور صوبے کا فائدہ ہو، ہمارے کئی ترقیاتی کام اس حکومت نے بند کردئیے ہیں۔

عمران خان سے ملاقات 

اس سے قبل سابق وزیراعظم عمران خان سے سابق وزیراعلیٰ پنجاب چوہدری پرویز الہیٰ نے ملاقات کی جس میں تحریک انصاف اور مسلم لیگ ق کی مشترکہ سیاسی صف بندی  سے متعلق اہم امور پر تبادلہ خیال کیا گیا۔

ذرائع نے بتایا کہ عمران خان سے ملاقات سے پہلے چوہدری پرویز الہیٰ نے پارٹی کی سینئیر قیادت سے مشاورتی اجلاس کی صدارت کی جس میں مستقبل کے سیاسی فیصلوں پر غور و خوص کیا گیا۔

ملاقات میں اسد عمر اور فواد چوہدری سمیت پی ٹی آئی کے مرکزی رہنما شریک تھے۔ ملاقات میں مسلم لیگ ق کے 10 سابق اراکین پنجاب اسمبلی اور سینئر رہنما بھی شریک تھے۔

سابق ارکان اسمبلی حافظ عمار یاسر، شجاعت نواز، عبداللہ یوسف وڑائچ، بائو رضوان، ساجد بھٹی، احسان الحق، محمد افضل، باسمہ چوہدری اور خدیجہ عمر فاروقی بھی ملاقات میں شریک تھے۔

جیل بھرو تحریک

پاکستان تحریک انصاف کی جیل بھرو تحریک  کا پہلا مرحلہ آج لاہور سے شروع ہوگا، شاہ محمود قریشی، عمر سرفراز اور ولید اقبال سمیت 200 پارٹی کارکن پولیس کے حوالے کر دیں گے۔

پی ٹی آئی کے کارکنوں نے اپنے چیئرمین کی ہدایت پر جیل جانے کی بھرپور تیاریاں کر لی ہیں۔

زمان پارک میں لوگوں کی بڑی تعداد جمع ہے۔

خواتین کارکنان بھی عدالتی گرفتاری کے لیے تیار ہیں۔

پی ٹی آئی کے کارکن پرامید ہیں کہ جب ’عوام کا سمندر‘ حکام کے سامنے ہتھیار ڈال دے گا تو جیلیں بھر جائیں گی اور مزید لوگوں کو لے جانے کی جگہ نہیں ہوگی۔