پاکستان تحریک انصاف (پی ٹی آئی) کے چیئرمین عمران خان نے مینار پاکستان پر ہونے والے کامیاب جلسے پر اہلِ لاہور کا شکریہ ادا کیا ہے۔

سماجی رابطے کی ویب سائٹ ٹوئٹر پر اپنے جاری کردہ بیان میں عمران خان نے کہا کہ بدمعاشوں کے لاہور کو بند کرنے اور ہمارے 2000 کارکنوں کو گرفتار کرنے کے باوجود، لاہور کے لوگ ہمارے چھٹے دفعہ مینار پاکستان کے جلسے کو کامیاب بنانے کے لئے بڑی تعداد میں آئے۔

Despite cabal of crooks locking down Lahore (see map) & arresting 2000 of our workers, people of Lahore came in huge numbers to make our 6th Minar-i-Pakistan jalsa a great success. I want to especially thank my Lahorites for not letting me down yet again. Proud of you. pic.twitter.com/rrRiRx5uSl

— Imran Khan (@ImranKhanPTI) March 26, 2023

 سابق وزیراعظم نے مزید کہا کہ میں خاص طور پر اپنے لاہوریوں کا شکریہ ادا کرنا چاہتا ہوں جنہوں نے مجھے دوبارہ مایوس نہیں کیا، مجھ تم پر فخر ہے۔

واضح رہے کہ گزشتہ روز چیئرمین پاکستان تحریک انصاف عمران خان نے مینار پاکستان جلسے سے خطاب کرتے ہوئے کہا تھا کہ سب سے پہلے اللہ کا شکر ادا کرتا ہوں، اللہ لوگوں کے دلوں میں ڈالتا ہے تو کوئی طاقت نہیں روک سکتی۔

عمران خان نے کہا کہ افسوس سے کہنا پڑتا ہے قوم کو ہر قسم کا ظلم برداشت کرتے دیکھا، آج میں آپ کو اپنا پروگرام دوں گا۔

یہ بھی پڑھیں: پی ٹی آئی جلسہ: عمران خان آج لاہور میں خطاب کریں گے

  سابق وزیراعظم نے کہا کہ ہم پر مسلط لوگوں نے ملک آزاد نہیں ہونے دیا، غلام رینگتے ہیں جبکہ آزاد انسان اوپر جاتے ہیں۔

ان کا کہنا تھا کہ ایک سازش کے تحت ہماری حکومت گرائی گئی اور اس ملک کے بڑے بڑے جرائم پیشہ لوگوں کو ہمارے اوپر مسلط کیا گیا، آج جو بھی اقتدار میں بیٹھے ہیں انہیں یہ پیغام جانا چاہیے کہ لوگوں کے جنون کو کنٹینرز سے نہیں روکا جاسکتا۔

لاہور میں مینار پاکستان پر تحریک انصاف کے جلسے سے خطاب کرتے ہوئے عمران خان نے مزید کہا کہ یہاں جنگل کا قانون ہے، ہمارے 2 ہزار کارکنوں کو اٹھالیا، پی ڈی ایم نے ہمارے دور میں 3 مارچ کیے، کوئی ایف آئی آر نہیں ہوئی، 25 مئی کو ہم نے مارچ کیا تو گھروں میں گھس کر لوگوں کو اٹھا کر لے گئے۔