جوڈیشل کمپلیکس اسلام آباد میں پولیس پر تشدد کے معاملے کی تحقیقات کیلئے جے آئی ٹی بنانے کا فیصلہ کیا ہے۔

تفصیلات کے مطابق وفاقی حکومت کی جانب سے اسلام آباد میں سابق وزیراعظم عمران خان کی پیشی کے موقع پر واقعات کی تحقیقات کیلیے جے آی ٹی بنانے کا فیصلہ   کیا گیا ہے۔

ہائی پاورڈ مشترکہ تحقیقاتی ٹیم بنانے کی سمری تیار کرلی گئی ہے اور وزارت داخلہ جے آئی ٹی کی تشکیل کی سمری آج وزیراعظم کو بھجوائے گی ۔

جے آئی ٹی میں وزارت داخلہ، پولیس کے سینئر افسر سمیت ساس اداروں کے افسران بھی شامل ہوں گے جو کہ سات دِن میں تحقیقاتی رپورٹ پیش کرے گی ۔

یہ بھی پڑھیں: جوڈیشل کمپلیکس ہنگامہ آرائی، عمران خان سمیت متعدد رہنماؤں کیخلاف مقدمہ درج

جے آئی ٹی جوڈیشل کمپلیکس اسلام آباد میں پولیس پر تشدد کی تحقیقات کرے گی جس دوران پٹرول بم حملوں، کالعدم تنظیموں کے تربیت یافتہ عسکریت پسندوں سے متعلق حقائق جمع کئے جائیں گے  اور جوڈیشل کمپلیکس کا گیٹ توڑنے، پتھراﺅ، موٹر سائیکل اور گاڑیاں جلانے کے تمام شواہد جمع کئے جائیں گے ۔

اس کے علاوہ املاک کی توڑ پھیلاﺅ، آتش زنی ، کار سرکار میں مداخلت اور تشدد کے پہلوﺅں کا احاطہ کیاجائے گا  اور پولیس پر آنسوگیس شیل کس نے چلائے، کس نے مہیا کئے، کا بھی تعین کیا جائے گا ۔

جے آئی ٹی ریاستی اداروں کے خلاف عوام کو اکسانے، تشدد پر بھڑکانے کے ذمہ داروں کو تعین کرے گی اور جے آئی ٹی کی رپورٹ کی روشنی میں حکومت مزید قانونی کارروائی کا فیصلہ کرے گی۔