پاکستان تحریک انصاف کے رہنما فرخ حبیب نے کہا ہے کہ عمران خان کو جیل میں ڈال کر کسی کی خواہش کی تسکین کرنا ہے۔

سابق وفاقی وزیر فرخ حبیب نے لاہور میں میڈیا سے گفتگو کرتے ہوئے کہا کہ عمران خان پر ایک قاتلانہ حملہ پہلے بھی ہوچکا ہے، پس پردہ بہت سے معاملات ہیں۔

انہوں نے مزید کہا کہ عمران خان کو جیل میں ڈال کر کسی کی خواہش کی تسکین کرنا ہے، 22 کروڑ لوگ عمران خان کے ساتھ ہیں۔

دوسری جانب پی ٹی آئی کے وائس چیئرمین شاہ محمود قریشی نے بھی زمان پارک کے باہر میڈیا سے گفتگو کرتے ہوئے کہا کہ ہم قانون کے دائرے میں رہتے ہوئے اپنا دفاع کر رہے ہیں۔

 شاہ محمود قریشی نے مزید کہا کہ عمران خان کا دفاع کریں گے، ان کے عزائم کو اللہ خاک میں ملائے گا۔

اس سے قبل فرخ حبیب نے ٹوئٹر پر زمان پارک کے راستے بند کرنے سے متعلق ویڈیو شیئر کرتے ہوئے لکھا کہ پولیس نے زمان پارک کو جانے والے تمام راستے بند کردیے ہیں۔

انہوں نے کہا کہ عمران خان کی جان کو خطرہ ہے لیکن پس پردہ ایسے حالات پیدا کروائے جارہے جہاں ان کی سیکیورٹی کمپرومائز کرواکردوبارہ قاتلانہ حملہ کروایا جائے۔

فرخ حبیب نے مزید کہا کہ F8 کچہری میں حاضری کسی death trap سے کم نہیں بار بار وارنٹس ایشو کروائے جارہے ہیں اور پولیس جیسے عملدرآمد کررہی وہ سب کو معلوم ہے۔

واضح رہے کہ سابق وزیراعظم عمران خان کی ممکنہ گرفتاری کے پیشِ نظر پولیس کی بھاری نفری مال روڈ پہنچ گئی۔

لاہور میں چیئرمین تحریکِ انصاف عمران خان کی ممکنہ گرفتاری کے پیشِ نظر پولیس کی نفری زمان پارک کی جانب رواں دواں ہے۔

پولیس کے دو افسران نے ہاتھوں میں پلے کارڈز اٹھا رکھے ہیں، پلے کارڈز کے اوپر نوٹس موصول کروانے کے حوالے سے تحریر موجود ہے۔

اس موقع پر پی ٹی آئی کارکنان بھی اپنے چیئرمین کی گرفتاری روکنے کے لیے زمان پارک میں بڑی تعداد میں جمع ہو گئے ہیں۔