سابق وزیراعظم اور پی ٹی آئی چیئرمین عمران خان کی ممکنہ گرفتاری کے خلاف احتجاج کرنے پر کراچی، راولپنڈی اور اسلام آباد سمیت ملک کے کئی بڑے شہروں میں پولیس نے پی ٹی آئی کے سینکڑوں کارکنوں کے خلاف مقدمات درج کر لیے ہیں۔

کراچی:

عمران خان کی ممکنہ گرفتاری کےحوالے سے کراچی کے مختلف مقامات پر پی ٹی آئی کی جانب سے کیئے جانے والے احتجاج کے خلاف سرکار کی مدعیت میں مقدمات درج کر لیئے گئے ہیں۔

مقدمات اپوزیشن لیڈر سندھ اسمبلی حلیم عادل شیخ سمیت پی ٹی آئی صوبائی رہنمائوں کے خلاف درج کیئے گئے ہیں۔

مقدمے میں کار سرکار میں خلل املاک کو نقصان پہنچانے اور عوام کو حبس بے جا میں رکھنے سمیت انسداد دہشت گردی کی دفعات شامل کی گئی ہیں۔

پاکستان تحریک انصاف کے چیئرمین عمران خان کی ممکنہ گرفتاری کے خلاف احتجاج پر پی ٹی آئی کے رہنماؤں اور کارکنوں کے خلاف 6 مقدمات درج کرلیے گئے ہیں ۔

یہ بھی پڑھیں: عمران خان کی ممکنہ گرفتاری کیخلاف پی ٹی آئی کارکنان کا ملک بھر میں احتجاج

مقدمات تھانہ ڈاکس، سچل اور شاہ لطیف، نارتھ ناظم آباد ،عزیز بھٹی اور پیر آباد میں پتھراؤ، جلاؤ، گھیراؤ، کار سرکار میں خلل عوام کو حبس بے جا میں رکھنے کی دفعات کے تحت درج کیئے گئے جبکہ ڈاکس تھانے کی حدود میں ایم پی اے شاہ نواز جدون پر قائم مقدمے میں انسداد دہشت گردی کی دفعات بھی شامل کی گئی ہے جبکہ دو درجن کے قریب کارکنوں کو گرفتار کیا گیا ۔

مقدمہ نامزد ملزمان سمیت پانچ سو سے زائد نامعوم افراد کے خلاف کیا گیا ہے مقدمے کے متن کے مطابق سندھ اسمبلی میں اپوزیشن لیڈر حلیم عادل شیخ ، ممبر صوبائی اسمبلی شاہ نواز جدون اور دیگر رہنمائوں نے قومی شاہراہ کو بند کرنے پولیس اور دیگر گاڑیوں پر پتھراؤ کرنے اور اپنے کارکنان کو اشتعال انگیز تقریر سے ورغلایا مظاہرین کی ہنگامہ آرائی سے پولیس اہلکار سمیت متعدد افراد زخمی ہوئے۔

مقدمے کے متن میں مزید کہا گیا ہے کہ کافی سمجھانے کے باوجود پاکستان تحریک انصاف کے عہدیداران نے بات نہیں سنی، جان سے مارنے کی نیت سے فائرنگ کرکے خوف و ہراس پھیلایا گیا۔

اسلام آباد:

اسلام آباد کے علاقے ترنول میں پولیس نے امیر مغل سمیت پی ٹی آئی کے تین رہنماؤں کے علاوہ پارٹی کے 60 نامعلوم کارکنوں کے خلاف مقدمہ درج کر لیا۔

اسی طرح پولیس نے ایکسپریس وے پر پولیس پر پتھراؤ کرنے والے پی ٹی آئی کارکنوں کے خلاف بھی دہشت گردی کے الزامات کے تحت مقدمہ درج کیا جس کے نتیجے میں تھانہ کھنہ کے ایس ایچ او سمیت تین پولیس اہلکار زخمی ہوئے۔

راولپنڈی:

راولپنڈی میں احتجاج کے دوران پولیس اہلکاروں پر حملہ کرنے پر پی ٹی آئی کارکنوں کے خلاف سٹی تھانے میں مقدمہ درج کر لیا گیا جو کہ ڈی ایف سی حسنین رضا بھٹی کی شکایت پر درج کیا گیا ہے۔

مقدمات میں پولیس سے مزاحمت،شارع عام کو بلاک کرنے سمیت دیگر دفعات شامل ہیں جبکہ 28افراد کو گرفتار کرکے MPO-03 کے تحت جیل بھجوایا جارہاہے۔

اس حوالے سے سی پی اوسید خالد محمودہمدانی  کا کہنا ہے کہاحتجاج کے نام پر قانون شکنی،توڑپھوڑ، پولیس پر حملہ اور شاہراہوں کو بند کرنے کی اجازت نہیں دی جاسکتی، قانون کی بالا دستی اور شہریوں کی جان ومال کی حفاظت پر کوئی سمجھوتہ نہیں۔

سابق ارکان پنجاب اسمبلی واثق قیوم عباسی، اعجاز جازی، عمر تنویر اور آصف محمود سمیت 14 پارٹی رہنما شامل ہیں جن کے خلاف مقدمہ درج کیا گیا ہے اور اسی طرح پی ٹی آئی کے 16 نامعلوم کارکنوں کے خلاف بھی مقدمہ درج کیا گیا۔