وفاقی وزیر برائے آبی وسائل سید خورشید شاہ نے کہا ہے کہ عمران خان کا یوں چھپ کر بیٹھنا سیاست پر بدنما داغ ہے۔

لاہور کی صورت حال سے متعلق پیپلز پارٹی کے مرکزی رہنما خورشید شاہ نے اپنے جاری کردہ بیان میں کہا کہ پی ٹی آئی ایک سیاسی پارٹی ہے، سیاسی پارٹی کا لیڈر چھپتا نہیں ہے۔

انہوں نے کہا کہ عمران خان کا یوں چھپ کر بیٹھ جانا اچھا تو نہیں ہے، ان کا چھپ کر بیٹھنا سیاست پر بدنما داغ ہے، میں نے اپنی سیاسی زندگی میں کسی کو اس طرح چارپائی کے نیچے چھپتے نہیں دیکھا۔

عدالتوں کو اپنا کام کرنا چاہیے

وفاقی وزیر نے کہا کہ ہم نے دیکھا کہ عمران خان کے گھر سے پیٹرول بم پھینکے گئے، ہم نے جلسوں میں سیاست دانوں کو شہید ہوتے دیکھا ہے۔

خورشید شاہ نے مزید کہا کہ ہم نے سیاستدانوں کو جیل میں پھانسی کی سزا کے انتظار میں بیٹھے دیکھا ہے، یہ لوگ عدالتوں کی عزت وتکریم ختم کرنا چاہتے ہیں، عدالتوں کو اپنا کام کرنا چاہیے۔

زمان پارک میں ہنگامہ آرائی

واضح رہے کہ گزشتہ روز مان پارک سے چیئرمین پی ٹی آئی عمران خان کو گرفتار کیے جانے کے خدشے کے پیش نظر پولیس اور پی ٹی آئی کے کارکنان میں تصادم ہوا تھا ۔

پولیس اور تحریک انصاف کے کارکنوں کے درمیان پتھراؤ اور شیلنگ کا سلسلہ وقفے وقفے سے جاری  رہا جبکہ پولیس کی جانب سے شیلنگ اور پتھراؤ کے باعث زمان پارک میں مقیم رہاشیوں کی املاک کو نقصان پہنچا ۔

اس کے علاوہ آنسو گیس کی شیلنگ اور پتھراؤ کے باعث کئی گھروں کی کھڑکیوں کے شیشے ٹوٹ گئے  جبکہ آنسو گیس کی شیلنگ کے باعث زمان پارک کے رہائشیوں کو شدید مشکلات کا سامنا رہا۔

پولیس کی جانب سے آنسو گیس کے شیل لگنے سے کئی افراد زخمی ہوئے جبکہ شیر خوار بچے بھی آنسو گیس سے شدید متاثر ہوئے۔

یہ بھی پڑھیں: پی ٹی آئی رہنماؤں اور کارکنوں کیخلاف کئی شہروں میں مقدمات درج

علاوہ ازیں مسلح پولیس نے تحریک انصاف کے کارکنوں پر سیدھے فائر اور شیلنگ کی جس کے بعد ایک بار پھر زمان پارک کو میدان جنگ میں تبدیل کر دیا ۔

پی ٹی آئی کارکنان اور پولیس کے درمیان تصادم کے نتیجے میں 51 پولیس اہلکار زخمی ہوئے جبکہ 8 شہری بھی زخمی حالت میں اسپتال منتقل ہوئے۔