سابق وزیراعظم عمران خان کی گرفتاری اور 2 صوبوں میں الیکشن کے معاملے پر اتحادی حکومت میں اختلافات بڑھنے لگے ہیں۔

ذرائع کے مطابق دوصوبوں میں الیکشن اور عمران خان کی گرفتاری کے معاملات پر حکمران اتحاد میں تقسیم بڑھنے لگی پی ڈی ایم کی بڑی جماعتیں مسلم لیگ ن اور جے یو آئی الیکشن سے فرار اور عمران خان کو گرفتار کرنے کی حامی ہیں۔

دوسری جانب پی ڈی ایم سے باہر مگر حکومتی اتحاد میں شامل پی پی پی عمران خان کی گرفتاری کے خلاف اور دوصوبوں میں الیکشن میں بھرپور حصہ لینے کی حامی ہے۔

ذرائع کا کہنا تھا کہ پی پی پی نے پارلیمانی بورڈ بھی بنادیا اور ٹکٹوں کے لئے درخواستیں بھی طلب کرلی ہیں جبکہ مسلم لیگ ن اور جے یو آئی نے تاحال پارلیمانی بورڈز بنائے ہیں نہ ہی ٹکٹس جاری کئے ہیں۔

یہ بھی پڑھیں: پیپلزپارٹی کا قومی اسمبلی کے ضمنی انتخابات کے بائیکاٹ کا فیصلہ

اس کے علاوہ تحریک انصاف اپنی پوری تیاری کے ساتھ الیکشن لڑنے کو تیار ہے۔

خیال رہے کہ  حکومتی اتحاد میں شامل تمام جماعتوں کی جانب سے ضمنی انتخابات کے بائیکاٹ کا فیصلہ کیا گیا ہے۔

ذرائع نے بتایا کہ پیپلز پارٹی نے امیدواروں کو ضمنی انتخابات کے لئے جمع کرائے گئے کاغذات نامزدگی واپس لینے کی ہدایت کر دی گئی۔

ذرائع کا کہنا ہے کہ پیپلزپارٹی ضمنی انتخابات میں حصہ نہ لینے کے معاملے پر تقسیم تھی، پیپلزپارٹی نے حکومتی دباؤ پر بائیکاٹ کا فیصلہ کیا۔

ذرائع کے مطابق وفاقی وزیر اطلاعات مریم اورنگزیب کے اعلان کے بعد پیپلز پارٹی نے امیدواروں کو ہدایت کی۔