پاکستان تحریک انصاف کے وائس چیئرمین شاہ محمود قریشی نے کہا ہے کہ عدالتیں جو فیصلہ کریں گی ہم سرتسلیم خم کریں گے۔

سابق وفاقی وزیر شاہ محمود قریشی نے اسلام آباد ہائی کورٹ میں صحافیوں سے گفتگو کرتے ہوئے کہا کہ ہم عدالت کے سامنے پیش ہورہے ہیں،عدالتیں آزاد ہیں۔

انہوں نے کہا کہ پی ڈی ایم حکومت ناکام ہو گئی، معاشی بدحالی بڑھ گئی ہے۔ مینار پاکستان جلسے سے قبل ہمارے کارکنوں کی گرفتاریاں کی گئیں، گرفتاریوں، راستوں کی بندش کے باوجود جلسے میں تل دھرنے کی جگہ نہیں تھی۔

شاہ محمود قریشی نے کہا کہ پہلے ایک بیان آیا تھا ادھر ہم، ادھر تم، اس سے ملک کو نقصان ہوا تھا، آج یہ بیان اسی سوچ کی عکاسی کررہا ہے، یا ہم یا تم۔

انکا کہنا ہے کہ ملک سب کا ہے ، سب نے یہاں رہنا ہے، ہمارا سیاسی اختلاف ضرور ہے، ذاتی تو نہیں ہے، ہماری کوئی دشمنی تو نہیں ہے۔

سابق وفاقی وزیر نے مزید کہا کہ جمہوریت میں فیصلہ عوام نے کرنا ہے، انتخابات کروادیں، لوگوں کو فیصلہ کرنے دیں، ملک کو آگے لے کر چلتے ہیں، حقیقی آزادی کے لیے قوم تیار ہے۔

شیخ رشید کی گفتگو

دوسری جانب سابق وفاقی وزیر شیخ رشید نے بھی اسلام آباد ہائی کورٹ میں میڈیا سے گفتگو کرتے ہوئے کہا کہ چیف جسٹس کے بھائی اور والد کے مجھ پر بہت احسانات ہیں، جو پلاٹ خالی دیکھتا چیف جسٹس کے والد کے پاس جاتا وہ مجھے پلاٹ دلوا دیتے۔

انہوں نے کہا کہ بیس بیس کلومیٹر چل کر لوگ مینار پاکستان جلسے میں گئے، مینار پاکستان کے جلسے میں پانی چھوڑا گیا، رانا ثناء اللہ اجرتی قاتل ہے اور بدمعاش ہے، رانا ثناءاللہ جو خانہ جنگی کر رہا ہے اسی کی بھینٹ وہ خود چڑھے گا۔

شیخ رشید نے کہا کہ یہ کہنا کہ ہم رہیں گے یا وہ، پارٹیاں کبھی ختم نہیں ہوتیں گندے لوگ کئی ختم ہو گئے، ہم الیکشن چاہتے ہیں بے شک اکھٹے ہوں جائیں یا الگ الگ یا ملا کر وہ جائیں۔

سابق وفاقی وزیر نے مزید کہا کہ عمران خان کی قتل کی سازش کے بیان پر آج بھی قائم ہوں، ہم اداروں کے ساتھ صلح رکنا چاہتے ہیں، فوج اور اسٹیبلشمنٹ کے ساتھ کوئی لڑائی نہیں بلکہ تیرہ کے ٹولے کے ساتھ ہے۔